"Милан"нинг эътибори А Серия юлдузига тушди

Римнинг “Лацио” клуби ярим ҳимоячиси Сергей Милинкович-Савич Италиянинг бошқа бир клуби – “Милан” қизиқишлари доирасига тушиб қолди. Бу ҳақда Lazio Press нашри хабар бермоқда.

Манбанинг ёзишича, “россонерилар” 27 ёшли сербиялик футболчининг номзодини яқинда “Ньюкасл”га сотиб юборган Сандро Тоналига ўринбосар сифатида кўриб чиқмоқда. Милинкович-Савичнинг трансфер нархи эса 50 миллион еврога баҳоланмоқда.

Сергей ўтган мавсумда римликлар таркибида жами 47 та ўйинда қатнашиб, 11 та гол урди ва 8 та голли узатмани амалга оширди. Томонлар ўртасидаги амалдаги шартнома муддати келаси йилнинг ёзигача ҳисобланган.