Моуриньо бир неча трансферларни блоклади: Шомуродовнинг иши нима бўлади?

Жозе Моуриньо Европа футболида истеъдодли ёшларни кашф қилишда етакчи мутахассис ҳисобланади. Португалиялик мутахассис “Рома”да ҳам шу ишини давом эттириб, қитъа футболига бир неча янги номларни очиб берди.

“Рома” ана шундай талантларга бой клуб сифатида бошқа жамоалар скаутларининг нишонида туриши ҳам ҳеч кимга кир эмас.

Қишки трансферлар мавсумининг ярми ўтиб бўлган бир паллада пойтахт клуби бир неча ўйинчисига бошқа жамоалардан жиддий таклифлар олди.

“Рома” фаолиятини ёритиб бораётган манбалардан бири - https://www.forzaroma.info  сайтининг ёзишича, Жозе Моуриньо ўзи катта футболга йўлланма берган ўйинчилар – Эдоардо Бове, Кристиан Вольпато ва энди асосий таркибга қўшилган Бенжамин Тоҳировичга Италия ва хориждан бўлган барча таклифларни блоклади.

Португалиялик мутахассис бу ўйинчиларни жамоа келажаги, деб ҳисобламоқда ва имкон қадар уларнинг ўйин амалиётига эга бўлиши учун имконият беришга ҳаракат қилади.

Манбаларнинг таъкидлашича, “Рома” клуби раҳбарияти асосан икки ўйинчиси – Элдор Шомуродов ва Рик Карсдорпни сотиб юборишга ҳаракат қилмоқда.

 Il Messaggero нашри журналисти Жанлука Ленгуа “Рома” ўзбек ҳужумчиси трансфери масаласида “Торино” билан музокараларни давом эттираётганини тасдиқлади. Римликлар УЕФАнинг молиявий фейр-плей талабини бажариши учун чиқиш трансферларини расмийлаштиришга мажбур. Шунинг учун ҳам спорт директори Тьягу Пинто туринликлардан Шомуродовни тўлиқ трансфер қилишни сўраяпти.

Кейинги пайтда легионеримизга Испания чемпионати вакили – “Вальядолид” ҳам қизиқиш билдираётгани ҳақида хабарлар тарқала бошлади.

Қишки трансферлар якунланишига ўн кундан ортиқ вақт бор ва Шомуродовга бошқа вариантлар чиқиши ёки давом этаётган музокаралардан бирортаси самарали якунланишининг эҳтимоли катта.

Шунингдек, “Рома” мутасаддилари нидерландиялик ҳимоячи Рик Карсдорпнинг трансферини уюштиришни ҳам назардан қочиргани йўқ.

27 ёшли ўнг қанот ҳимоячиси умумий гуруҳ машғулотларида қатнашаётган бўлса-да, Жозе Моуриньо уни расмий учрашувлар қайдномасига киритмаяпти. Бунга янги йил олдидан улар ўртасида юз берган можаро сабаб бўлганини ҳамма яхши билади.

Рик Карсдорпга “Монца” ва “Салернитина” клубларидан чорлов бўлди. Бироқ, футболчининг 2,2 миллион евро миқдоридаги йиллик маоши Италия клубларига оғирлик қилмоқда.

Айни пайтда Тьягу Пинто Карсдорпга оғиз солган “Лион” ва  “Фулхэм” каби хориж клублари таклифини ўрганиб чиқмоқда.

Легионеримиз лигани тарк этмоқда. Мураббийнинг илтимоси ўтмади!

Шомуродов Месси бошчилигидаги супертўпурарлар билан бирга!