Мутахассислар "Реал"ни ЕЧЛ фаворити эмас деб ҳисоблайди. Анчелотти эса уларга жавоб қайтарди

"Реал" Мадрид бош мураббийи Карло Анчелотти танқидчилар ва кўплаб мутахассислар мадридликларни Чемпионлар лигасининг жорий мавсумида фаворит деб билмаслигини айтиб, "Ливерпуль", "Манчестер Сити", ПСЖ ва "Бавария"ни олтин медаллар учун даъвогар деб ҳисоблаши ҳақидаги фикрга муносабат билдирди.

“Мутахассислар бизнинг имкониятларимизни жуда паст баҳолаганидан ҳайрон эмасман. Мен буни жамоа учун мотивация бўлиши керак деб ҳисоблайман. Сабаби, ўтган йили ҳам худди шундай ҳолат кузатилган эди, бироқ якунда “Реал” ғалаба қозонди.

Бу мавсум ҳам олдинги каби ҳаракат қиламиз, яъни “Реал” охиригача курашади”, - дея Анчелоттининг сўзларини келтиради “Goal”.

Мадриднинг “Реал” клуби ўтган мавсум Чемпионлар лигаси финалида “Ливерпуль”ни 1:0 ҳисобида мағлуб этган, бунгача улар ПСЖ, “Челси” ва “Манчестер Сити”ни турнирдан чиқариб юборган эди.

“Реал” Мадрид  Чемпионлар лигасининг жорий мавсумини “Селтик”ка қарши ўйин билан бошлайди. Учрашув бугун Тошкент вақти билан тунги 00:00да бошланади.