МЮ “Барса”дан қимматбаҳо юлдузни текинга беришни сўраяпти

“Манчестер Юнайтед” мутасаддилари “Барселона”га бош оғриқ бўлаётган Усмон Дембелега иш беришга тайёр эканини маълум қилди. Бироқ манчестерликлар каталонияликларга бир пайтлар 135 миллион еврога тушган юлдузни текинга олмоқчи бўляпти.

Дембеленинг “Барса” билан шартномаси ёзда якунланади ва у янги битим тузмайди. МЮ хўжайинлари “Барселона” ярим йил учун пул олмасдан Дембелени қўйиб юборишига эришмоқчи.

Бунинг учун “Барселона” футболчига “La carta de libertad”, деган махсус ҳужжат тақдим қилиши керак. Мана шу ҳужжат ўйинчига муддатидан олдин клубни тарк этиш ҳуқуқини беради. Қолаверса, бу шартномани муддатидан олдин бекор қилиш ҳисобланмайди ва каталонияликлар Усмоннинг кетиши учун компенсация тўлашдан озод бўлади.

31 январгача Усмон Дембелени сотиб юборишга қарор қилган “Барселона” ҳозирча бу таклифга муносабат билдирмади.