"Насаф"дан кетиш сабаби, сербиялик мураббийнинг ўйин услуби ва Суперлиганинг энг яхши ярим ҳимоячиси ҳақида Жўрабек Маннонов билан суҳбат

Ўтган мавсум Про-Лигада иккинчи ўринни қўлга киритиб, Суперлигага йўл олган Самарқанднинг "Динамо" жамоаси янги мавсум олдидан бир нечта яхши савиядаги футболчиларни ўз сафига қўшиб олди. Жумладан, "Насаф" ярим ҳимоячиси Жўрабек Маннонов янги мавсумни "Динамо" сафида ижарада ўтказади. SPORTS.uz сайти футболчи билан интервью ташкиллаштирди.

– Ассалому алайкум, Жўрабек янги жамоага ўтганингиз билан табриклаймиз. Адаптация жараёни қандай кечмоқда?

– Катта раҳмат. Жамоага мослашиб кетишим қийин бўлмади. Сабаби, клубнинг ички муҳити аъло даражада. Янги келганларни илиқ кутиб олишди.

– "Насаф"дан кетишингизга нима сабаб бўлди? Очиғи, мен жамоангизни алмаштиришингизни кутмаган эдим.

– "Динамо"дан таклиф бўлгач, ўйладим. Уйдагилар билан маслаҳатлашдим. Бир қарорга келишим қийин бўлди. Ўйин амалиётига эга бўлиш учун ҳам Самарқанд клубига кўчиб ўтдим. "Насаф"га тажриба тўплаб, юқори савияда "аждарлар" сафига қайтмоқчиман.

– Айни кунларда Туркияда янги мавсумга тайёргарлик кўряпсизлар. Йиғин қандай кечмоқда?

– Йиғин давомида бир қатор ўртоқлик учрашувлари ўтказяпмиз. "Динамо" ўйиндан ўйинга шаклланиб бормоқда.

– Нима учун айнан "Динамо"? Улар сизга асосий таркибдан ўйин кафолатладими?

– Ҳеч қайси футболчига асосий таркиб кафолатланмайди. Асосийда фақат муносиб ва жамоага ёрдами кўпроқ тегадигани ўйнайди.

– Жамоа бошқарувига сербиялик Предраг Роган келди. Унинг машғулотларида қатнашяпсиз. Мураббий қандай ўйин услубини тарғиб қилмоқда?

– Жаноб Роган жуда талабчан. У машғулотлар жараёнида ҳар бир деталга эътибор қаратади. Ўйлайманки, бу бизга катта ёрдам беради. Қандай услуб? Буни янги мавсум бошланганда кўриб оласиз. "Динамо" бу йил кўплаб жамоаларга бош оғриқ бўлади.

– Собиқ жамоангиз "Насаф" 27 февраль куни Ўзбекистон Суперкубоги баҳсида "Пахтакор"га қарши майдонга тушади. Бу ўйиндан нималар кутяпсиз?

– Худо хоҳласа, албатта "аждарлар" ғалаба қозонади ва Қашқадарё ҳалқини хурсанд қилади. Мен бунга ишонаман.

– Самарқандлик мухлислар ҳам катта футболни соғинган. "Динамо" ҳам мавсумни айнан "Пахтакор"га қарши ўйин билан бошлайди...

– Бу ўйинни йигитлар интиқлик билан кутяпти. Афсус, ушбу баҳсда дисквалификация сабабли иштирок эта олмайман. Барча мухлисларга ўйинни стадиондан кузатишни тавсия қиламан.

– Сиз ярим ҳимоя чизиғида ҳаракат қиласиз. Айни дамда Суперлиганинг энг яхши ярим химоячиси ким?

– Ойбек Бозоров ва яна Ойбек Бозоров. У юқори савияли футболчи. Ойбек ўз ишини моҳирона бажаради.

Жалолиддин Қобилжонов суҳбатлашди.