"Навбаҳор" футболчиси Черногория терма жамоаси йиғинига чақирилди. "Лочинлар"дан яна кимлар термада?

"Навбаҳор"нинг черногориялик 27 ёшли ҳимоячиси Милош Милович Миодраг Радулович мураббийлик қилаётган Черногория терма жамоасига чақирилди. Бу ҳақда клуб матбуот хизмати хабар берди. 

Радулович шогирдлари 12 октябрда ўз майдонларида ОФК вакили Ливан термасига қарши ўртоқлик учрашуви ўтказса, 17 октябрь куни "Евро – 2024" саралаш баҳслари доирасида сафарда Сербия термаси билан куч синашади. 

Хабарингиз бор, жорий йилнинг ноябрь ойидан бошлаб "ЖЧ-2026" саралаш беллашувларида иштирок этадиган, мазкур ўйинларга тайёргарлик доирасида 10-17 октябрь кунлари Хитойда ўқув-машғулот йиғини ўтказадиган Ўзбекистон терма жамоаси мазкур йиғин доирасида 13 октябрь куни Вьетнам ҳамда 16 октябрь куни Хитой термаларига қарши ўртоқлик баҳслари ўтказади.

Миллий терма жамоамизнинг ушбу йиғини ва бўлажак назорат баҳсларига бош мураббий Сречко Катанец “Навбаҳор”нинг 4 нафар футболчиси дарвозабон Ўткир Юсупов, ярим ҳимоячилар – Остон Ўрунов, Жамшид Искандеров ҳамда ҳужумчи Жасур Яхшибоевни жалб этди. 

Шунингдек, жорий йилнинг 11-15 октябрь кунлари Ўзбекистон U-21 ёшлар терма жамоаси “Қизилтоғ”да ўқув-машғулот йиғини ўтказади. Ушбу йиғинга “лочинлар”нинг 20 ёшли маҳоратли ярим ҳимоячиси Музаффар Муминов жалб этилди. 

Жорий йилнинг  6 ноябрь – 2 декабрь саналарида Индонезияда бўлиб ўтадиган U-17 жаҳон чемпионатида қатнашадиган Ўзбекистон U-17 термасининг ўқув-машғулот йиғинига эса “лочинлар”нинг 4 нафар ўйинчиси дарвозабон Озодбек Маърупов,  ҳимоячилар Шерзод Абдулбориев, Озодбек Ўктамов ҳамда ҳужумчи Шодиёр Шодибоев жалб этилди.