"Навбаҳор" йиғинидаги 9 легионердан 6 тасига жавоб берилди. Улар кимлар?

Хабар берганимиздек, 12 январь куни “Навбаҳор” аъзолари Про-лига вакили Яйпаннинг “Турон” жамоасига қарши ўртоқлик учрашуви ўтказишди. Мазкур ўйинда наманганликлар устози Андрей Канчельскис асосан кўрикдан ўтаётган легионерлар ва айрим маҳаллий футболчиларни майдонга тушириб, уларни синовдан ўтказди.

Мазкур ўйиндан сўнг, мураббий бир қатор хорижлик ҳамда маҳаллий ўйинчиларга жавоб беришга қарор қилди. Бу ҳақда клуб матбуот хизмати хабар берди.

Кўрикда бўлган легионерлардан камерунлик Мбасси Эммануэль Риккардо, россиялик Алексей Курилов, Станислав Ефимов ва Буньямудин Мустафоев, нидерландиялик Нельсон Грегори Жаррелд Мартлалес ҳамда украиналик Дмитрий Скоблов, шунингдек, айрим маҳаллий футболчиларга жавоб берилди.

Шу тариқа, “лочинлар” ихтиёрида кўрикдан ўтаётган 3 нафар хорижлик ўйинчи – хорватиялик Вилим Посинкович, россиялик Артём Шербак ва озарбайжонлик Фуат Байрамов қолишди.