"Нефтчи" устозида Про лицензияси йўқ. Левченко масалага ойдинлик киритди
Бир неча дақиқа олдин сайтимиз орқали ЎзПФЛ бош директори Диёр Имомхўжаевнинг “Нефтчи” бош мураббийи Виталий Левченкода Про лицензияси йўқлиги ва шу сабабли клуб бошқа мутахассис топиши кераклиги ҳақида ўзининг телеграмдаги каналида хабар ёзиб қолдиргани хусусида маълумот бериб ўтгандик.
Мазкур ҳолат бўйича Sports.uz мухбири дарҳол “Нефтчи” бош мураббийи Виталий Левченко билан боғланди. Мураббий ушбу масала юзасидан шундай деди:
"Менинг штабимда фаолият олиб бораётган ёрдамчим Владимир Ежуровда Про лицензияси бор. Шунинг учун бу масалада ташвишланарли ҳолат йўқ. Сентябрь ойи охирларида эса менинг Про лицензияси учун имтиҳоним бор".
Левченко шундан сўнг Украина футбол ассоциациясидан “Нефтчи” клубига айнан Про лицензияси имтиҳони бўйича юборилган расмий хатни ҳам кўрсатди.
Демак, кўриниб турибдики, Виталий Григорьевич ҳаммасини ҳисобга олган. Унинг штабида Про лицензиясига эга мураббийнинг борлиги ҳам бежиз эмас. Ўзи эса сентябрь ойида мазкур лицензия учун имтиҳондан ўтади.
Фикрлар