Неймар Жаҳон чемпионатидаги илк ўйинни ўтказиб юборади

Бразилия терма жамоаси бош мураббийи Карло Анчелотти аввал жароҳат олган ҳужумчи Неймар Жаҳон чемпионати доирасида Марокашга қарши ўйинни ўтказиб юборадиганини маълум қилди.

“Пентакампеонлар” 14 июнь, якшанба куни Жаҳон чемпионатидаги илк ўйинини Марокашга қарши ўтказади.

Анчелоттининг айтишича, Неймар тикланиш жараёнида бўлиб, у келаси ҳафта жамоага қайтиши кутилмоқда.

“Неймар тўлиқ тез тикланиш учун меҳнат қилмоқда. У келаси ҳафта жамоага қўшилиши кутилмоқда. Биз Неймардек футболчини нафақат техник салоҳияти, балки тажрибаси ва ёш ўйинчиларга бериши мумкин бўлган намунаси учун ҳам терма жамоага чақирганмиз”, — деди Анчелотти Globo нашрига.

34 ёшли ҳужумчи ҳозир оёқ мушаклари жароҳатидан тикланмоқда.