Неймар Роналдунинг изидан бормоқда

ПСЖ ҳужумчиси Неймар парижликлар сафида яна иккита тўп киритса, ҳамюрти Ромарио ва португалиялик Криштиану Роналду натижасини такрорлайди. Ҳар икки футболчи фаолияти давомида учтадан клубда 100 тадан ортиқ гол урган.

Ромарио ўз вақтида “Васко де Гама”, ПСВ ва “Фламенго”да юзлик довондан ўтган. Криштиану Роналду жса “Реал”, “Ювентус” ва “Манчестер Юнайтед”да юзтадан кўп тўп киритган.

Неймар профессионал футболчилик фаолиятини бошлаган “Сантос” сафида 223 та учрашувда 136 маротаба, “Барселона”га кўчиб ўтганидан кейин 186 та ўйинда 105 та гол муаллифи бўлди. Беш мавсумдан бери парижликлар шарафини ҳимоя қилаётган бразилиялик ҳужумчи ҳозирги жамоасида 140 маротаба майдонга тушиб, 98 марта рақиблар дарвозасини ишғол қилди.

Энди у бу кўрсаткич бўйича учинчи футболчига айланиши учун яна иккита аниқ зарба керак бўлади.

Неймар Бразилия терма жамоаси сафида 117 та учрашувда ўз ҳисобига 71 гол ёздириб қўйган. Яна олти марта тўп киритса, терма жамоа учун кўп гол уриш бўйича футбол қироли Пеле билан тенглашиб олади.