"Сити"нинг 122 миллион фунтлик иккинчи таклифи ҳам рад этилди

"Манчестер Сити" раҳбарияти "Ноттингем Форест"га жамоа ярим ҳимоячиси Эллиот Андерсон трансфери бўйича иккинчи таклифини юборди, аммо яна рад жавобини олди. 

BBC Sport хабарига кўра, манкунияликлар таклифи 106 миллион фунтни ташкил этган, бонуслар билан бирга сумма 122 миллион фунтгача етиши мумкин эди.

Агар томонлар келишувга эришса, 23 ёшли ярим ҳимоячи футбол тарихидаги энг қимматбаҳо инглиз футболчисига айланади. 

Ҳозирча бу борада рекорд 2023 йилда "Вест Хэм"дан "Арсенал"га 105 миллион фунт эвазига ўтган Деклан Райсга тегишли.

Андерсон — "Ньюкасл" тарбияланувчиси. У 2024 йилда "Ноттингем Форест№ сафига 15 миллион фунт эвазига қўшилган. 

Ўтган мавсумда у АПЛда 38 ўйин ўтказиб, тўртта гол урди. Умуман олганда, клуб учун 92 марта майдонга тушиб, олти бор рақиб дарвозасини ишғол этган.

Манбаларга кўра, клублар ўртасидаги музокаралар турнир давомида ҳам изчил равишда давом этиши мумкин.