"Номларга қараб хулоса қилиб бўлмайди, "Навбаҳор"нинг мураббийлар штаби кенг экан, охирги 3 та ўйинимизни келиб кузатишди, бизда эса..." - Асрор Алиқулов

Навоийнинг “Қизилқум” жамоаси ҳам Туркиянинг Анталия шаҳрида йиғин ўтказиб қайтди. Бош мураббий Асрор Алиқулов Суперлигада дебютини ўтказади. Аммо унга ҳам илк мавсумида осон бўлмаслиги шубҳасиз.

Шунга қарамай, Асрор Чориевич “Қизилқум”да ўзининг режалари ва футболга қарашига хос тарзда жамоа шакллантиришга ҳаракат қиляпти.

Анталиядан қайтар чоғимизда, аниқроғи аэропортда Алиқулов Sports.uz журналистининг суҳбатлашиш таклифига розилик билдирди.

- Мураббий сифатида ҳамма вақт ишлайсизу, аммо хаёлингиздан яна нимадирлар ўтади, ҳар доим ўзингиздан камчилик топасиз. Фақат легионерларимиз бироз кечроқ қўшилишди. Чемпионат стартигача қанақа ҳолатда етиб келиши ўйлантириб турибди. 4 март кунги илк учрашувга қадар барчаси шай ҳолатда, бўлади, деб умид қиламан.

- Ҳа, янги мавсумга оз фурсат қоляпти. Илк ўйин олдидан ҳаяжон сезилмаяптими? Ҳар қалай сизнинг Суперлигадаги бош мураббий сифатида дастлабки мавсумингиз яқинлашяпти.

- Ҳаяжон доим бўлади. Барибир стартга яқин сезилади. Асосийси, футболчилардаги хотиржамликни ушлаб қолиш. Чунки рақиб номдор ўйинчиларга эга. Биз меҳмонда ўйнаймиз. “Навбаҳор” ўз мухлислари билан ҳам ном қозонган. Албатта, стадион тўла ишқибозлар қаршисида тўп суриш ёқимли. Иккинчи тарафдан хотиржамликни ушлашимиз керак. Бу босимни енгишимиз лозим. Ўйлайманки, бизни қизиқарли учрашув кутиб турибди.

- Анталия йиғини давомида “Навбаҳор”нинг ўйинларини жонли кузатиш имконияти ҳам бўлдими?

- Уларнинг ўйинларини бориб кузатишга имкониятимиз бўлмади. Чунки ўйин ва машғулотларимиз бир режим асосида тузилганди. Лекин “Навбаҳор”нинг мураббийлар штаби кенг экан. Айтиш мумкинки, бизнинг охирги учта ўйинимизни келиб кузатишди. Бизда мураббийлар штаби унчалик кенг эмас. “Навбаҳор”нинг бир-иккита ўйинларига боришга ҳаракат қилмоқчи бўлдик. Лекин режим масаласи тўғри келмади. Ўтган йили ва бу йилги ўйинчилари, охирги ўйнаган ўйинлари, шулар орқали, ўрганиб тайёрланамиз.

- Мана, “Навбаҳор” билан ёнма-ёнсиз ва Анталиядан бирга қайтяпсизлар. Уларнинг таркибига қараб, нималарни ҳаёл суряпсиз?

- Тўғри, фамилиялар томонлама биздан устун. Майдонда кўплаб яхши савияли ўйинчилари бор. Аммо жамоавий ўйин орқали ва ўша куни қайси футболчи яхши тайёрланган бўлса, унинг имкониятлари баландроқ бўлади. Ҳозир номларга қараб, ўйин бошланмасидан аввал хулоса қилиб бўлмайди. Ҳа, рақибни ҳурмат қиламиз. Бироқ бизни ҳам мақсадимиз бор. Қизиқарли учрашув бўлади. Биз яхши беллашувга тайёрланяпмиз.

- Сизни олдинда осон бўлмаган фаолият кутяпти. “Қизилқум”ни ўтган йилги таркиби билан солиштирганда бу сафар яна ўзгариш катта бўлди. Кўпчиликда “Қизилқум” ўртаҳоллашди, кучсизланди, деган фикрларни эшитяпмиз. Бунга муносабатингиз қандай?

- Биринчи навбатда барибир футбол ичида юрибмиз, ўзим ҳам бундай нарсаларни сезаман. Жамоага бўлган эътиборни ва эплай оладими-йўқми, деган гаплар бўлади. Тўғри, клубни 90 фоиз футболчилар тарк этди. Янги жамоа тузиш жуда қийин ва бу вақт талаб қилади. Барибир Суперлига бизни кутиб турмайди. Буни ўйинчиларга имкон даражасида уқтиряпмиз ва ўзимиз ҳам тушуниб турибмиз. Мухлисларга қанақа таркиблигини қизиғи йўқ, уларга биринчи навбатда натижа керак. Раҳбариятга ҳам худди шундай. Тўғри, мураббий сифатида мен учун дебют ва таваккал. Аммо ишонч бор. Футболчиларимизга ҳам ишонамиз. Ўйлайманки, яхши жамоа тузяпмиз. Заиф нуқталарни тўлдиришга ҳаракат қилдик. Имкон даражасида ўзимиз ўйлагандан кўпроқ очколарни йиғишимиз лозим. Тўғри, “Қизилқум” номлар томонлама ютқазди, дейиш мумкин. Аммо жамоамиз қайси томонлама кучайди ёки кучсизлашди, буни барибир чемпионат кўрсатади.

- 1-турда “Навбаҳор”га қарши ўйин учун алоҳида режангиз борми?

- Қанақадир режа бор. Рақибнинг ўйинларини, видеоёзувларини кузатяпмиз. Янги қабул қилинган футболчилари бор. Шундан келиб чиқиб, таҳлил қиляпмиз. Туркия йиғинидан сўнг бироз дам оламиз. Ўйингача бўлган ҳолатда биз ўша куни қандай ўйнаймиз, режаларимизни муҳокама қилиб, қайси режа бизга муваффақият келтириши мумкин? Ўша режа асосида ўйинга тушамиз.

Шуҳратбек Жўраев.