Нўъмон Ҳасанов: Футболчиларимиз яхши майдонга ўрганиб қолган экан

“Машъал” ўз майдонида “Навбаҳор” дарвозасига жавобсиз учта гол урган ҳолда йирик ҳисобидаги ғалабани қўлга киритди. Учрашувдан кейин наманганликлар бош мураббийи Нўъмон Ҳасанов журналистларнинг саволларига жавоб қайтарди.

- Ўйин ҳақида таассуротларингиз қандай?

- Авваламбор, “Машъал” жамоасини ғалаба билан табриклайман. Биринчи голни ўтказиб юборганимиздан кейин ўйинимиз қовушмади. Биринчи бўлимда ҳам ўзимиз истагандек тўп сура олмадик. Футболчиларимиз яхши майдонга ўрганиб қолган экан. Балки шунинг учун комбинацион ўйин ташкил қила олмадик. Бунинг устига ушбу ўйин учун яхши майдонда шуғуллана олмадик ҳам. Чунки қор ёғди. Залда ўтди машғулотларимиз, кўчага ҳам чиқа олмадик. Мана шу сабаблар ҳам ўйинимизнинг қовушмаганига таъсир қилди деб ўйлайман.

- Тошкентда марказлашган ҳолда ўтган ўйинда ҳам “Навбаҳор” “Машъал”га ютқазганди. Шу сабабли “Машъал”ни “Навбаҳор” учун ноқулай рақиб деб ўйлайсизми?

- Биринчи даврадаги учрашувни трибунада кузатгандим. Кўриб турибсизлар, жамоамизда ўйин ўзгарди. Учта беллашувда ғалабага эришдик. Ўйин услубимизда кўпроқ пас бериш орқали ҳужумларни ташкиллаштиришга эътибор қарата бошладик. Балки айтганингиз тўғридир, “Машъал” биз учун ноқулай рақибдир. Умуман, бугун ўйинимиз чиқмади. Агар яхшироқ майдон бўлганида бошқача ўйин кўрсатардик.

- Ўтказилган учта голда ҳам ҳимоячиларнинг хатолари кўзга ташланди. Бош мураббий сифатида айнан ҳимоячиларнинг айби катта, деб ўйлайсизми ёки дарвозабоннинг ҳам хатоси борми?

- Биринчи голда, менимча дарвозабоннинг хатоси бўлди. Негаки, биринчи ҳудуддан иккинчи ҳудудга пас ошириш орқали ўтамиз. Тўпни тепавериб охири дарвозамизга гол олиб келди, деб ўйлайман. Бугун ҳамма хато қилди. Ўтган ўйинларга қараганда, бу сафар йигитларимизнинг кўзи ёнмади. Айтяпман-ку, иккита машғулотимизни залда ўтказдик, ўзим ҳам яхши тайёрлантира олмадим.

- Ўзбекистонда қайси жамоаларнинг майдонларини “Машъал”никидан ёмонроқ деб ўйлайсиз?

- Аслида-ку, “Машъал”нинг майдони яхши. Бунгача доим бу ерга келганимизда майдон сифати қониқарли бўларди. Ўзи бу ерда қор ёғдими?

- Йўқ.

- Кўряпсизларку, тўп майдонда сакраб-сакраб кетяпти. Барибир Намангандаги майдон бошқачада. Ҳозирги вақтда Ўзбекистондаги энг зўр майдон “Навбаҳор”ники, деб ўйлайман. Бундан ташқари, илгари қиш пайтида чемпионат ўтказилмасди. Бундай пайтда майдонлар совуқ ҳавода қотиб кетади. Олдинлари чемпионатни эртароқ тугатардик. “Машаъл”нинг майдонини олдиндан биламан, энг яхшиларидан бири бўларди.

- Канчельскисдан қолган қайси ғоялар ва хатоларни йўқотиш қийинроқ бўляпти?

- Канчельскис даврида узун паслар орқали ўйин ташкил қилинарди. Бугун футболчиларимизнинг руҳиятини, ғалабага бўлган ишончини кўрмадим. Ҳамма мураббийнинг ҳар хил услуби бор. Канчельскиснинг ўз футболи, менинг эса ўз футболим бор. Кимндир яхши, кимнидир ёмон деб айтиш қийин.