No‘’mon Hasanov "Bunyodkor" ustidan qozonilgan g‘alabadan so‘ng nimalar dedi?

Superliga 21-turidan o‘rin olgan "Navbahor" - "Bunyodkor" uchrashuvi bo‘lib o‘tdi. Bellashuvda mezbonlar 2:1 hisobida zafar quchishdi.

O‘yindan so‘ng "lochinlar" ustozi No‘’mon Hasanov uchrashuv borasida o‘z fikrlarini bildirib o‘tdi. Bu haqda klub matbuot xizmati xabar berdi.

- Assalomu alaykum! Xudoga shukr, bugun uzoq kutilgan g‘alabaga erishdik. Buning uchun yigitlarga katta rahmat aytaman. Futbolchilar kuchli jamoaga munosib qarshilik ko‘rsata olishdi.

“Bunyodkor” jamoasi a’zolariga ham chiroyli o‘yin namoyish etishgani uchun rahmat aytaman. Har ikki jamoa bugun ochiq o‘yin namoyish etdi. Hisob ochilganidan so‘ng, negadir yigitlar hujumkorlikni susaytirishdi. Natijada tanaffusga sanoqli daqiqalar qolganida mehmonlar hisobni tenglashtirishdi.

Ikkinchi bo‘limda yigitlar tanaffusda berilgan ko‘rsatmalarga to‘liq amal qilib, ikkinchi to‘pni kiritganimizdan so‘ng, ochilib, to‘pni nazorat qilishdi hamda zafar quchishdi. Buning uchun yigitlarga minnatdorlik bildiraman. To‘g‘ri, xatolar bo‘ldi. Jamoaga men kutgan o‘yinni namoyish etishi uchun vaqt kerak. Hali bu borada ish olib boramiz, - dedi No‘’mon Hasanov.