Нуну Мендеш Ўзбекистонга қарши тайёрлаб қўйилган комбинация ҳақида гапирди

Португалия терма жамоаси ҳимоячиси Нуну Мендеш "ЖЧ-2026" саралаш босқичида Ўзбекистонга қарши ўйиндан сўнг ўз фикрларини билдирди. Португалия терма жамоаси Тошкентдаги баҳсда йирик – 5:0 ҳисобида ғалаба қозонди. Мазкур учрашувда 17-дақиқада стандарт вазиятдан аниқ зарба йўллаган Нуну Мендеш ҳам гол муаллифига айланди.

Мендешнинг таъкидлашича, у урган гол тасодиф эмас, балки олдиндан режалаштирилган комбинация натижаси бўлган.

"Бу – олдиндан тайёрлаб қўйилган комбинация эди, биз бундай вазиятларни машғулотларда кўп марта такрорлаганмиз. Ҳамма жарима зарбасини Криштиану Роналду йўллайди, деб ўйлайди. Бундай ҳолатлар яна бўлади. Балки бу сафар мен эмас, бошқа футболчи зарба бериши мумкин, лекин албатта такрорланади", – деди у TVI телеканали эфирида.

Ҳимоячи мусобақадаги илк йирик ғалабадан мамнун эканини ҳам билдирди.

"Биз натижадан хурсандмиз. Жамоа жуда жипс ва диққатни йўқотмаган ҳолда ўйнади. Энди тикланиш, кейинги ўйинга пухта тайёргарлик кўриш керак. Гуруҳ босқичини биринчи ўринда якунлашни истаймиз", – дея таъкидлади Мендеш.

У шунингдек, старт турида Конго ДР терма жамоасига қарши дурангдан сўнг жамоага қаратилган танқидларга ҳам тўхталиб ўтди.

"Танқид – футболнинг бир қисми, биз бунга кўникиб бўлганмиз. Жамоамизда ҳамма бир-бирини қўллаб-қувватлайди. Энг муҳими – ўз ғояларимизга содиқ қолиш ва мураббий талаб қилаётган нарсаларни майдонда бажариш", – деди Португалия терма жамоаси аъзоси.

28 июнь куни гуруҳда 4 очко билан пешқадам бўлиб турган Португалия терма жамоаси навбатдаги ўйинни Колумбияга қарши ўтказади.