ОКМК сўнгги назорат ўйинида ғалаба қозонди

Кеча, 27 июль куни ОКМК Суперлига иккинчи давраси олдидан сўнгги ўртоқлик учрашувини "Машъал" клубига қарши ўтказди.

Ёпиқ эшиклар ортида бўлиб ўтган беллашувда "кончилар" рақибини 2:1 ҳисобида мағлуб этди.

Дастлаб муборакликлар 3-дақиқада ҳисобни очишга эришган бўлса, бунга жавобан ҳозирда ОКМК таркибида кўрикда бўлиб турган Клейди Датси 43 ва 86-дақиқаларда "Машъал" дарвозасига гол уриб, олмалиқликлар ғалабасини таъминлади.

Эслатиб ўтамиз, "кончилар" Суперлига доирасида 3 август куни Андижонга сафар уюштириб, "Андижон" клуби меҳмони бўлади.

ОКМК матбуот хизмати.