ОКМК "Сурхон"га қарши ўртоқлик учрашувида майдонга тушди

ОКМК “Дўрмон”да ташкил этилган ўртоқлик учрашувида Термизнинг “Сурхон” жамоаси билан куч синашди.

30 дақиқадан икки бўлимли иккита ўйин ўтказилган қарама-қаршиликда ОКМК дастлаб 2:0 ҳисобида ғалаба қозонди ва иккинчи ўйинда худди шу ҳисобда мағлуб бўлди.

Учрашув тенг курашлар остида бошланди. Олмалиқликлар илк дақиқаларда тўп назоратини қўлга олди. Қатор ҳужумлардан сўнг 18-дақиқага келиб ажойиб комбинациядан сўнг Ойбек Рустамов узоқ масофадан кучли зарбаси билан рақиб дарвозасига хавф солди. 33-дақиқага келиб ОКМК ажойиб комбинация орқали ҳисобни очди. Акрамжон Комиловнинг бошлаб берган ҳужумини Санжар Турсунов давом эттириб Хуршид Ғиёсовга мукаммал узатма берди, Ғиёсов эса ўзиданда қулайроқ вазиятда қолган Мартин Боакега тўпни узатаётганда рақиб ҳимоячиси автоголга сабабчи бўлди – 1:0.

Иккинчи гол эса 54-дақиқада киритилди. Ўнг қанотдан Дилшодбек Аҳмадалиевнинг ҳаводан ошириб берган узатмасини Мартин Боаке дарвозага тўғирлаб қўйди – 2:0!

Шу тариқа илк учрашув ўз ниҳоясига етди.

Ўртоқлик учрашуви

25 март, шанба. “Дўрмон” қароргоҳи стадиони

ОКМК – “Сурхон” - 2:0

Голлар: Султонмуродов (33-авт), Боаке (54)

ОКМК: Эргашев, Аҳмадалиев, Исмоилов, Раҳмонов, Комилов, Рустамов, Турсунов, Хақназарий, Гадоев, Мартин, Ғиёсов.

Иккинчи ўйинда эса ОКМК таркиби бутунлай ўзгартирилди. Дастлабки дақиқаларданоқ рақиб жамоа ҳужумларга фаол қўшилди. 41-дақиқага келиб термизликлар ҳисобни очишди. Азизбек Шамсиддиновнинг узоқ масофадан йўлланган кучли зарбасини Дилшодбек Ёқубов қайтара олмади — 0:1!

Голдан сўнг “Сурхон” жамоаси аъзолари янада руҳланган ҳолда иккинчи голни ҳам киритишди. 45-дақиқада Асадбек Каримов ўз маҳоратини намойиш этиб ҳисобни ишончли кўринишга келтирди – 0:2!

Ўртоқлик учрашуви

25 март, шанба. “Дўрмон” қароргоҳи стадиони

ОКМК – “Сурхон” - 0:2 (2:2)

Голлар: Шамсиддинов (41), Каримов (45)

ОКМК: Ёқубов, Сулаймонов, (Юмаев, 41), Фозилов, Салем, Тошматов, Башриддинов, Эрматов, Ҳасанов, Санчес, Мираҳмадов, Рухадзе.

ОКМК матбуот хизмати.