Олти очколик ўйин, ўртамиёнага айланаётган клуб, марказий тўқнашув ёхуд Суперлигада яна супер тўқнашувлар

Суперлиганинг 13-тури ҳам бошланиш арафасида. Ўйинлар эса беш кунга бўлинган. Охирги баҳс 5 июль куни “Сўғдиёна” – “Қизилқум” беллашуви орқали якун топади. Бу ёзги танаффус олдидан охирги тур эканлигини ҳисобга олсак, ҳар бир клуб ғалаба билан тугатгиси келади.

Жуфтликлар орқали ҳам бу турнинг ниҳоятда қизғин ўтишини билиш қийин эмас. Шу сабабли ўз вақтида моҳир ҳужумчилардан бўлган ва ҳозирда мураббийлик малакасини ошираётган Бахтиёр Ҳамидуллаев клубларнинг имкониятларини баҳолади.

28 июнь (сешанба)

“Қўқон-1912” – “Динамо”

- Менимча, бу ўйин турнинг энг марказий ўйинларидан бири ҳисобланади. Турнир жадвалида жамоалар бир-бирига яқин туришибди. “Динамо” ўйинида янги мураббийнинг имзоси кўриняпти, иккита учрашувда ҳам яхши ҳаракат қилишди, аммо ғалаба учун нимадир етишмаяпти. Ҳужумчилари гол ура олмаяпти. Вазиятлар эса яратиляпти. Сафардаги учрашув самарқандликлар учун ҳам катта аҳамиятга эга бўлса керак. Иккала жамоа майдонга борини ташлайди, улар учун бу олти очколик ўйин бўлади. Назаримда, имкониятлари тенг. У ерда ҳақиқий жанговар баҳс гувоҳи бўламиз.

29 июнь (чоршанба)

“Пахтакор” – “Бунёдкор”

- Янги мураббий билан ҳам “Бунёдкор”нинг ишлари унчалик юришмаяпти. “Пахтакор” эса ўзига келаётгандик. Охирги учрашувда ҳам Навоийда “Қизилқум”ни ютди. “Пахтакор”да 5-ўринга тушиб кетганида тушкунлик ҳолати кўриниб турганди, энди эса ўзига ишончи ортяпти. Менимча, ушбу жуфтликда “Пахтакор”нинг қўли баланд келади.

“Сурхон” – “Нефтчи”

- Бу ҳам муҳим учрашувлардан бири. Жадвалда ёнма-ён боришяпти. Ўйлашимча, 60х40 “Сурхон” фойдасига. Мезбонларда имконият кўпроқ деб ўйлайман.

30 июнь (пайшанба)

“Насаф” – “Олимпик”

- АГМКга қарши ўйинда “Насаф” мағлубиятдан қутулиб қолди. Агар “Олимпик”ни ютса яна юқорига кўтарилиб, совринли ўринлар учун курашда ўзига қулай имкониятни келтиради. Менимча, бу жамоа майдонда энг яхши ўйинларидан бирини кўрсатиб, ғалаба қозонса керак.

“Металлург” – “Локомотив”

- Бу учрашувда “Металлург”нинг қўли баланд келса керак. Бекобод жамоасида хорижлик мутахассислар ишлашяпти, савия ҳам яхши. “Металлург” клубига натижа керак ва бунинг учун қаттиқ ҳаракат қилишяпти. “Локомотив” ўртамиёна клубга айланиб қолди. Балки спорт директори этиб тайинланган Сервер Жепаров янгиликларга қўл урар. Бунга бироз вақт керак. “Локомотив” қайси даражада ўзгариши кейинроқ кўринади.

1 июль (жума)

АГМК – “Навбаҳор”

- Ушбу жуфтлик ҳам жуда муросасиз бўлади. Менимча, имкониятлар 50х50. “Навбаҳор” ҳам қаттиқ талашяпти. Совринли ўринлар учун астойдил курашаётгани билиняпти. Умуман айтганда, иккала клубнинг ҳам мақсади бир.

5 июль (сешанба)

“Сўғдиёна” – “Қизилқум”

- Менимча, “Сўғдиёна” ютади. Ҳозир ОФК Кубогида иштирок этяпти. У ерда гуруҳ босқичидан чиқишига ишонаман. Сафардан яхши кайфият билан қайтишади. “Қизилқум” эса ўз ўйинини кўрсата олмаяпти. Бошида яхши кетаётганди.