Оқ уйдан қўнғироқ бўлганидан кейин ФИФА Балогуннинг дисквалификациясини бекор қилди

Халқаро футбол федерацияси (ФИФА) АҚШ терма жамоаси ҳужумчиси Фоларин Балогунга қўлланган дисквалификацияни бекор қилди. Бу қарор жаҳон чемпионати 1/8 финал баҳсидан олдин, ташкилот президенти Жанни Инфантинога Оқ уйдан қўнғироқ бўлганидан сўнг қабул қилингани хабар қилинмоқда. 

Бу ҳақда журналист Бен Жейкобс ўзининг X тармоғидаги саҳифасида маълум қилди.

Бундан аввал The Athletic нашри ФИФА интизом қўмитаси Балогунга нисбатан дисквалификацияни вақтинча тўхтатиб, унга Бельгияга қарши бўладиган учрашувда майдонга тушишга рухсат берганини ёзган эди. Кейинчалик АҚШ президенти Дональд Трамп ФИФАга ҳужумчига берилган қизил карточкани бекор қилгани учун миннатдорлик билдирган.

- Оқ уй тўғридан-тўғри ФИФАга қўнғироқ қилиб, Жанни Инфантинони Фоларин Балогунга кўрсатилган қизил карточкани қайта кўриб чиқишга чақирди. Футбол ташкилоти эса қарор ўзининг мустақил қўмитаси хулосаларига асосланганини таъкидламоқда. ФИФАдаги манбаларга кўра, интизом кодексида белгиланган ваколатлар ва қўмитанинг мустақил мақоми туфайли Оқ уйнинг аралашуви қарор қабул қилиш жараёнига таъсир кўрсатмаган, — дея келтиради журналист ўз манбаларини.

25 ёшли Балогун 2023 йил ёзидан бери Франция чемпионатида иштирок этувчи “Монако” клуби шарафини ҳимоя қилади. Жаҳон чемпионатида у 3 ўйинда 3 та гол урди ва ҳозирча АҚШ терма жамоасининг энг самарали ўйинчиси ҳисобланади.

АҚШ ва Бельгия терма жамоалари ўртасидаги учрашув Москва вақти билан 7 июлга ўтар кечаси бўлиб ўтади. Ғолиб жамоа чорак финалда Испания ва Португалия терма жамоалари ўртасидаги жуфтликда зафар қучган рақиб билан тўқнаш келади.

Жаҳон чемпионати АҚШ, Канада ва Мексика ҳудудида ўтказилмоқда. Мусобақа 19 июль куни якунланади. Амалдаги жаҳон чемпиони — Аргентина терма жамоаси.