“Ўрмончи” Манчестер майдонида 114 йиллик рекордни янгилаб кетди

Англия Премьер-лигасининг 15-турида португалиялик икки бош мураббий ўзаро тўқнаш келди. Рубен Аморим бошчилик қилаётган “Манчестер Юнайтед” ўз мухлислари кўз ўнгида Нуну Эшпириту Санту қўл остидаги “Ноттингем Форест”ни қабул қилди.

Ўйинда “ўрмончилар” 3:2 ҳисобида зафар қучди. Рубен Аморим Англияга келганидан бери қаторасига икки маротаба учрашувни бой берди.

“Олд Траффорд”даги баҳс рақиб жамоа устози Нуну Эшпириту Сантунинг номини тарихга ёзди. У “Манчестер Юнайтед”га қарши ўтказган дастлабки икки учрашувида кетма-кет ғолиб чиққан тарихдаги иккинчи мураббий бўлди.

Сантуга бу ишни 114 йил муқаддам британиялик мураббий Харри Хаслем уддалаган. Унинг шогирдлари 1909-1910 йилги мавсумда “Манчестер Юнайтед”ни 6:2, 2:0 ҳисобида таслим қилган эди.

Нуну Эшпириту Санту Англия чемпионатида “Манчестер Юнайтед”га қарши илк учрашувини ўтган мавсумнинг 20-турида ўтказган ва ўшанда унинг шогирдлари 2:1 ҳисобида зафар қучган эди.