Осимхен ва Невеш суперклубга ўтишга розилик берди. Уларни қайси жамоада кўрамиз?

Килиан Мбаппени ушлаб қола олмаган ПСЖ таркибини бошқа юлдузлар билан кучайтиришга интилмоқда.

Таниқли журналист Фабрицио Романониг маълум қилишича, “Наполи” тўпурари Виктор Осимхен ва “Бенфика” юлдузи Жоау Невеш фаолиятини Париж суперклубида давом эттиришга розилик берган. Бу икки футболчини кўндирган ПСЖ мутасаддилари энди уларнинг клублари билан келишиб олиши кутилмоқда.

“Наполи” ўз ўйинчиларини қиммат баҳолайдиган клуб ҳисобланади. Италияликлар нигериялик ҳужумчи трансферидан 130 миллион евро ишлаб олмоқчи. Парижликлар бу трансферни 100 миллион евро атрофидаги суммага ҳал қилмоқчи.

“Бенфика” раҳбариятининг ҳам иштаҳаси ёмон эмас. Лиссабонликлар Transfermarkt портали томонидани 55 миллион еврога баҳоланган ўйинчи учун 120 миллион евро талаб қиляпти. ПСЖ вакллари Невеш учун 60 миллион евро бадал пули ва 10 миллион евро бонус таклиф қилди.

Томонлар ҳали узоқ музокара қиладиган кўринади. Чунки Осимхеннинг “Наполи” билан шартномаси ҳали икки йил давом этади. Невеш эса, “Бенфика”да 2028 йилнинг ярмигача қолиш учун имзо чекиб берган.