"Остон Ўрунов индивидуал ҳаракатларига маҳлиё"

Ҳамон “Спартак” клубига тегишли бўлиб турган легионеримиз Остон Ўруновнинг кейинги тақдири ҳозирча номаълумлигича қолмоқда. Футболчимиз ҳақида турли гап-сўзлар бору, аммо барчаси оғизда, амалда эса...

Куни кеча россиялик таниқлик футбол намоёндаларидан бири Александр Кержаков Sports.uzга интервью берган чоғида сайтимиз журналисти Шуҳратбек Жўраевнинг Остон Ўрунов ҳақидаги саволига ҳам жавоб қайтариб, футболчимиз борасида ўзининг шахсий фикрини билдирди.

“Мураккаб савол. Қолаверса, Ўрунов майдонда мен амал қиладиган ўйин фалсафасидан сал бошқачароқ ҳаракатланади. Шу боис у билан ишлаш менга бироз қийин туюлиши аниқ. Устига-устак охирги икки мавсум Ўрунов учун ўта мураккаб кечди.

Тўғри, дебют мавсум ёмон чиқмаганди. Боз устига Остоннинг ўйинчилик салоҳияти ҳам жойида. Лекин баъзида Остон Ўрунов майдонда индивидуал ҳаракатларига махлиё бўлиб қолади. Аксинча, футболчи бундай кезларда ўзини кўзлаши эмас, балки жамоа учун ўйнамоғи шарт. Агар шундай йўл тутса, ватандошингизда имконият юқори бўлиши тайин. Мен Ўруновни жамоавий эмас, балки индивидуал даражадаги футболчи деб ҳисоблайман”, - дейди Кержаков.

Хабарингиз бўлса керак, охирги пайтларда Александр Кержаковни “Торпедо” клубига бош мураббий бўлиб келиши мумкинлиги ҳақида ҳам гапиришяпти. Унгача Ўруновга “Торпедо” томонидан қизиқиш борлиги хусусида ҳам маълумотлар чиққанди. Александр Анатольевичнинг гапларидан келиб чиқиб фикр юритадиган бўлсак, агар у “Торпедо” устозига айланса, демак, Ўрунов учун ўз эшигини ёпади!

"Менга Насруллаев ёқади, Ўрунов ҳақидаги савол мураккаб, Ўзбекистондаги гўзалликларни кўрмоқчиман" - Кержаков SPORTS.UZ сайтига яна қизиқарли мавзулар ва Қосимов ҳақида гапирди