От спорти. Вакилларимиз мавсум якуни бўйича биринчи ўринда қоладиган бўлди

Евросиё лигаси доирасидан ўрин олган “Maxima Masters Team Competition” мусобақалар серияси якунланди.

Чавандозларимиз сўнгги босқични умумжамоа ҳисобида иккинчи ўринда якунлашди. Бироқ бу ҳамюртларимизнинг мавсум якуни бўйича биринчи ўринда қолишлари учун ҳеч қандай тўсқинлик қила олгани йўқ.

Қайд этиш жоиз, 4 босқичдан иборат мусобақанинг Ўзбекистон, Қирғизистон ва Қозоғистонда ўтган баҳсларида чавандозларимиз ажойиб иштироклари билан ҳар гал биринчи ўринни қўлга киритиб, муддатидан аввал мавсум ғолиблигини расмийлаштирган эдилар. Ушбу муваффақият ҳамюртларимизга Барселонада ўтадиган финал босқичи эшигини очган.

Шу ўринда муросасиз баҳслар давомида терма жамоамиз шарафини муносиб ҳимоя қилган Бекзод Қурбонов, Нуржан Туякбаев, Хуршидбек Алимжонов, Умид Камилов ва Аъзам Толиббоевларни алоҳида эътироф этиб, жамоамизга келгуси стартларда ҳам омад тилаймиз.

МОҚ матбуот хизмати