Ўзбек футболидаги келишилган ўйинлар билан боғлиқ можаро хронологияси

Яқиндагина SPORTS.uz сайтининг электрон почтасига номдор букмекерлик компаниясидан хат келиб тушди. Унга кўра, "Локомотив" жамоасининг икки ўйини шубҳа остига олинган ва ташкилот бу борада ФИФАга ариза ёзмоқчи эканлигини маълум қилган. Қуйида ушбу хат ва унинг таржимасини тақдим этамиз:

"Мен Осиё букмекерлик компаниясининг ўйинлар бўйича расмий инспекториман. Кузатувларимиздан сўнг мен ўзбек клуби билан муаммо (Тошкентнинг "Локомотив" клуби келишилган ўйинларда иштирок этган) борлигини аниқладим. Бу 100 фоиз аниқ ва тасдиқланган. Баҳс натижасини сунъийлаштириб, уларни букмекерлик компаниясига сотувчи осиёлик даллолга етказиб туришган.

Биз барча трансакцияларнинг исботини оламиз.
Илтимос қуйидагиларни текширинг,

1. 10 август, 2022 йил (АГМК ва "Локомотив")

2. 17 июнь, 2022 йил ("Локомотив" ва "Сўғдиёна")

3. Тикишлар қайд этилган расмлар;

4. Ўйинчиларнинг тотализатор видеоси;

5. Рақибларнинг видеоёзуви.

Ўзбекистон Клуби доирасидаги учрашувда 100 фоиз муаммо бор. Футболчи ва воситачиларнинг дастлабки сўровлари орқали ҳар бир жамоада 5 тадан келишилган ўйинда иштирок этган ўйинчи бор, натижа ҳам келишилган. Биз техник қўшимчаларни ўрганиб чиқдик ва трансакция ёзувлари, чат ёзувлари, расмлар, ўйинчиларнинг ставкалаш миқдори шунингдек, ғайритабиий кўрсаткичлар ва компаниядаги ўзгаришларни аниқладик. Компютер ўйин олдидан ғайритабиий кўрсаткичларни белгилаган ва ставкачиларни қаттиқ огоҳлантирган.

Жамоа ўз натижаларини яхшилаш учун бир қанча ўйинларда қатнашган. Биз янада кўпроқ далилларни ФИФА учун сақлаб қоламиз ва ўзбек ҳукумати, расмийлар, журналистлар, орган ходимлари, ўйинчилар, жамоа президентлари ва мураббийлардан барча аниқланган шахсларни устидан ўрганиш олиб боришини сўраймиз. Бизнинг компания далилларни халқаро полицияга кўрсатади ва эълон қилади (Биз ушбу хабарни ўзбек расмийларига ҳам юборамиз)."

SPORTS.uz билан боғланган шахслар ўз маълумоти тўғри эканлигини исботлаш мақсадида қуйидаги скриншотларни тақдим этди. Ўқувчиларимизга қулайроқ бўлиши учун, ушбу суратларда акс этган диалогларни ўзбек тилига ўгириб эътиборингизга ҳавола этамиз.

- Жуда ёмон. Жин урсин!

- Бирга ишлаймизми ёки йўқми? Ишаймиз, деб айт менга. Аммо ўтган сафаргидек бошлама. Мен сенга ўзим хабар бераман.
- Хўп. Мен гаров тикдим.

- Ишлаймизми?
- Ҳа, ишлаймиз.

- Хўп.
- Хабаримни кут

- СМС боради
- Тезроқ бўл. Озроқ тўхталиш бўлади. Сўнг СМС юборишим керак. У буни кўриши керак

- Хўп.
- Ишлаймиз а?

Е.К: - Улар 8 минут аввал ишга киришган. Ҳозир барча футболчилар асабийлашяпти. Улар сардор Кахидан пул талаб қилмоқда. Шунингдек, улар бутун мавсум ишлаб келишни исташмоқда. Сабаби, ҳозир клубда пул бор.

Тони: - Бу футболчилар мендан пул сўрамоқда. Уларга нима деб жавоб берай?

Эътиборлиси шундаки, ушбу суратларда "Локомотив" жамоасининг бир нечта футболчиси томонидан "Суғдиёна" билан ўйинга  "ставка қилинган". Баҳс якунида эса, "Локо"нинг мағлубияти ва "темирйўлчилар" легионерининг шубҳали қизил карточкасига гувоҳ бўлдик.

Букмекерлик компанияси томонидан берилган маълумотлар фактлари билан тақдим этилди. Ушбу хабардан сўнг кеча аввал ЎФА, кейин "Локомотив" клуби дастлабки баёнотини берди.

- Жорий йилнинг 4 сентябрь куни интернет тармоқларида келишилган ўйинларга оид бир қанча маълумотлар пайдо бўлди. Ўзбекистон футбол ассоциациясининг махсус инспекция бўлими мазкур ҳолат юзасидан суриштирув ишларини бошлаб юборган ва айни пайтда ўрганиш ишлари давом этмоқда. Шунингдек, вазиятни тўлиқ очиқлаш ва барча айдборларни аниқлаш юзасидан халқаро ташкилотлар билан ҳам музокаралар олиб бориляпти.

Суриштирув жараёнига оид маълумотлар ўрганилиб, якуний хулосалар чиқарилгач, ЎФА сайти орқали оммага тақдим этилади, - дейилади ЎФА хабарида.

- Футболга алоқадор сайтларда "Локомотив" ПФК футболчиси, асосий жамоа сардори Кахи Махарадзенинг келишилган ўйинда иштирок этгани юзасидан хабарлар тарқалди.

Шуни маълум қиламизки, айни пайт ЎФА "Футбол фаолиятини назорат қилиш бўйича махсус инспекцияси" ушбу масала юзасидан суриштирув-текширув ишларини олиб бормоқда.

Вазият қандай якун топиши ҳамда ҳақиқий айбдор(лар) топилиб жазоланиши "Локомотив" ПФК учун ҳам муҳим. Зеро жамоамиз ҳар доим ҳалол ўйин тарафдори бўлиб келган ва шундай бўлиб қолади. Биз келишилган учрашув, тотализатор ва ҳар қандай пул тикиш йўли билан ўйналадиган ўйинларга мутлақо қаршимиз!

"Локомотив" ПФК ушбу масала юзасидан ЎФА ва "Футбол фаолиятини назорат қилиш бўйича махсус инспекцияси"нинг расмий хабар беришини кутишини маълум қилади, - дея хабар берди клуб матбуот хизмати.

- Ух, бу хабарга ЎФАдан изоҳ берилади деб умид қиламиз ва (агар айбдор деб топилса) айбдорларни Этика қўмитасида кутиб қоламиз, - деди шарҳловчи Хайррула Ҳамидов.

- Бор умидим Кахи Махарадзедан. Унинг гапиришидан. Занжирнинг бошида ким турганини айтиши керак. У бошқа давлат фуқароси ва фаолиятини тугатса бўладиган ёшда экани умид беряпти. Акс ҳолда барча айбни у ва шериклари, яъни майда балиқларга тўнкаб, футболимизнинг "авлиё"лари сувдан қуруқ чиқиши эҳтимоли юқори. Қанийди шунақа бўлмаса, қанийди! - деди журналист Бобур Акмалов.

- “Локо” атрофидаги гап-сўзлар тўғриси, барчамизни эсанкиратиб қўйди. Бизнинг жамоадошлар, айниқса, Кахи бундай қилмаган бўлиб чиқишини жуда-жуда хоҳлардим.

Аммо, ижтимоий тармоқларда тарқалаётган маълумотларнинг барчаси ўз тасдиғини топадиган бўлса.., билмадим жамоада қандай муҳит юзага келади, қалбимизда қандай туйғулар жунбуш уради. Чунки мушкул ҳолатдан чиқиб кетиш ниятида жон жаҳди билан тиришаётган “Локо кемаси”даги аҳил жамоа орасида эшкакни тескари эшаётганлар бўлса жуда алам қилади-да...

Майли, кутамиз. Қарши сафаридан сўнг бугун дам олаётган жамоа аъзолари эртага (бугун назарда тутилмоқда) йиғилишади. Кўз-кўзга тик боққанда кўп нарса ойдинлашади... - деди "Локомотив" клуби шифокори Аброр Пирриев.

Ижтибоий тармоқларда шундай гаплар. Энди Ўзбекистон футбол ассоциацияси махсус инспекция бўлимининг суриштирувида барчаси аён бўлишига умид қиламиз. Кўпчилик Кахи легионер бўлгани учун ҳамма айбни ўз бўйнига олиб, футболимизни бутунлай тарк этади, деган ҳавотирда. Бундай ҳолатда юқоридаги инспекцияга ҳам тошлар отилади. Ўйлаймизки, махсус инспекция келишилган ўйинларнинг тагига етади ва ҳамма босимни ўзига қаратиб олмайди.

Воқеалар ривожини кузатамиз.