Ўзбекистон МТЖнинг Намангандаги илк ўйини, Аҳмедовсиз таркиб, мураббийлар штабидаги ўзгариш, учрашув олдидан қизиқ ҳолат ва бошқалар

Ўзбекистон миллий терма жамоаси ФИФА кунларидан ўрин олган навбатдаги ўқув-машғулот йиғинини 22 март кунидан бошлади.

"ЖЧ-2022" ва "Осиё кубоги-2023" қўшма саралаш босқичига тайёргарлик кўриш учун мураббийлар штаби 29 футболчидан иборат кенгайтирилган таркибни эълон қилди. Йиғин давомида вакилларимиз Гана ва Ироқ билан ўртоқлик учрашуви ўтказиши белгиланган. Африка қитъаси вакилига қарши учрашув бугун Наманганда 18:00да старт олади.

Ўзгаришлар

Аввалига таркибга жалб қилинган аксарият футболчилар ўз клубидаги учрашувларда иштирок этишини инобатга олган ҳолда, рўйхатда баъзи ўзгаришлар рўй бериши мумкинлиги ёзилганди. Орадан бир неча кун ўтиб, терма жамоага чақирилган бир неча нафар футболчи Суперлига баҳсларида ўз клуби сафида жароҳат олганлиги сабабли, мазкур ўртоқлик ўйинларини ўтказиб юбориши борасида хабар берилди.

Элдорбек Суюнов, Егор Кримец, Ҳожиакбар Алижонов, Лутфулла Тўраев, Сардор Собирхўжаев, Аброрбек Исмоилов, Темурхўжа Абдухолиқов ўрнига мураббийлар штаби миллий жамоамиз сафига Искандар Шайкулов ("Сўғдиёна"), Анзур Исмоилов ("Пахтакор") ва Жавоҳир Қаҳрамоновни ("Сўғдиёна") жалб этишди.

Шунингдек, МТЖ мураббийлар штабида ҳам ўзгариш рўй берди. Анвар Ғофуров ёрдамчи мураббий сифатида Вадим Абрамовга кўмаклашди.

Таркиб

Дарвозабонлар: Абдувоҳид Неъматов ("Насаф"), Жавоҳир Илёсов ("Локомотив")

Ҳимоячилар: Исломжон Қобилов, Санжар Қодирқулов (иккаласи –"Локомотив"), Иброҳимҳалил Йўлдошев, Фарруҳ Сайфиев, Анзур Исмоилов (барчаси – "Пахтакор"), Мурод Холмуҳаммедов ("Қўқон-1912"), Ислом Тўхтахўжаев ("Қизилқум"), Азимжон Аҳмедов ("Навбаҳор"), Искандар Шайкулов ("Сўғдиёна").

Ярим ҳимоячилар: Ҳожимат Эркинов, Ҳумоюнмирзо Иминов, Сардор Рашидов (барчаси – "Пахтакор"), Ойбек Бозоров ("Насаф"), Одилжон Ҳамробеков, Жалолиддин Машарипов (иккаласи – "Шабаб Ал Аҳли", БАА), Отабек Шукуров ("Шаржа", БАА), Санжар Шоаҳмедов (АГМК), Достонбек Ҳамдамов ("Хатта", БАА), Остон Ўрунов ("Уфа", Россия), Жавоҳир Қаҳрамонов ("Сўғдиёна").

Ҳужумчилар: Элдор Шомуродов ("Женоа", Италия), Шаҳзодбек Убайдуллаев ("Шахтёр Солигорск", Беларусь), Игорь Сергеев ("Актобе", Қозоғистон).

Бу галги йиғинда Одил Аҳмедов йўқ. У Хитой клуби томонидан чақиртирилгани боис, ўтган ойдаги хориж йиғинида ҳам қатнашмаганди. Сардоримизнинг ўрнига унинг ука Азим Аҳмедов таркибда. У ҳимоядаги бўшлиқлар борлиги учун термага чақирилганини мураббий айтиб ўтди. Шунингдек, бир неча ой авва Абрамов йиғинга Сардор Рашидовни чақирди. Анча вақт ўйин амалиётисиз юрган Рашидов “Пахтакор”дан қўним топди ва голлар уришни бошлади. Бу эса Карленовичнинг эътиборини тортган ёки мухлисларнинг Сардор борасидаги фикрини инобатга олган кўринади. Ҳар ҳолда энди Рашидов имкониятдан фойдаланишга уринади.

Қизиқ ҳолат

Наманганда бўладиган ўйиндан олдинги матбуот анжумани Тошкентда ўтказилди. Қизиқ, учрашувдан бир кун аввалги анжуман нега пойтахтда ташкил этилди, Наманганда эмас? Бунга расмийлар жавоб беришмади. Футболчилар ўйинга қачон келиши ва кетиши очиқ қолдирилди.

Маълумотларга қараганда, жамоалар 26 март куни тонгда чартер рейс билан Наманганга келишади ва учрашувдан сўнг ортга қайтади. 

Шу ўринда бугунги беллашув илк бор Наманганда ўтказилмоқда. Терма жамоа биринчи марта “Навбаҳор” майдонида ўйнайди.

Ҳакамлар

"Марказий" стадионда ўтадиган мазкур баҳсни қирғизистонлик ФИФА рефериси Дайирбек Абдилдаев бошчилигидаги ҳакамлар бригадаси бошқариб боради. Ҳакамлар назоратчиси сифатида Баҳодир Қўчқоров фаолият юритади.

Бош ҳакам: Дайирбек Абдилдаев (Қирғизистон)

Ён ҳакамлар: Сергей Гришченко (Қирғизистон), Исмоилхон Толипжонов (Қирғизистон)

Захира ҳаками: Нурзутбек Аскат ўғли (Қирғизистон)

Ҳакамлар назоратчиси: Баҳодир Қўчқоров (Қирғизистон)