Озил Туркия футбол федерацияси президенти лавозимига асосий номзодлар қаторига кирди

"Реал" ва "Арсенал" клубларининг собиқ ярим ҳимоячиси Месут Озил Туркия футбол федерацияси (TFF) президенти лавозимига асосий номзодлар қаторига кирди, деб хабар қилмоқда турк оммавий ахборот воситалари.

Манбаларга кўра, 37 ёшли собиқ футболчи яқин вақтларда ўтказилиши кутилаётган сайловларда етакчи даъвогарлардан бири сифатида кўрилмоқда. Озил бугунга қадар бир неча бор Германияда туғилиб, ўша ерда тарбия топган турк футболчилари Германия терма жамоаси эмас, балки Туркия терма жамоаси шарафини ҳимоя қилиши кераклигини таъкидлаб келган.

Месут Озил 2023 йил март ойида профессионал футболчи сифатидаги фаолиятини якунлаган. У 2010–2013 йилларда Мадриднинг "Реал" клуби шарафини ҳимоя қилиб, жамоа билан биргаликда Ла Лига, Испания кубоги ва Испания суперкубогини қўлга киритган. Шундан сўнг саккиз мавсум давомида (2013–2021 йиллар) Лондоннинг "Арсенал" клубида тўп сурган.

Озил Германия терма жамоаси таркибида 92 ўйин ўтказган ва 2014 йилда жаҳон чемпиони бўлган. 2018 йилги жаҳон чемпионатидан сўнг у терма жамоа сафидаги фаолиятини тўхтатган. Футболчилик карьераси якунлангач, Озил тадбиркорлик фаолиятига ва киберспорт соҳасига эътибор қаратди, шунингдек, Мексиканинг "Некакса" клуби билан стратегик ҳамкор сифатида ҳамкорлик қилмоқда.