"Пахтакор" - "Бунёдкор" ўйини чипталари сотувидан тушган маблағ Николай Ширшовнинг оиласига ўтказиб берилади

Суперлига 13-турида "Пахтакор" Тошкент дербисида "Бунёдкор" билан майдонга тушади. Учрашув 29 июнь куни "Пахтакор" стадионида соат 20:00да бошланади.

Мазкур баҳсда мухлислар харид қилган чипталардан тушган маблағ тўлиғича жамоамизнинг афсонавий футболчиларидан бири Николай Ширшовнинг оиласига ўтказиб берилади. Бу ҳақда "шерлар" матбуот хизмати хабар тарқатмоқда.

"Чоршанба куни "Пахтакор" стадионига ташриф буюринг ва ўзбек футболи афсоналаридан бирининг оиласини қўллаб-қувватлашга ўз ҳиссангизни қўшинг", - дейилади клуб матбуот хизмати хабарида.

Маълумот учун, Николай Ширшов ўтган 2021 йил сўнггида вафот этган эди.

Агар Сиз олисда бўлсангиз ва акцияда иштирок этишни ният қилсангиз, Iticket тармоғидан чипта ҳарид қилинг.