"Пахтакор" Доҳага жўнаб кетди. "Шерлар" 22 апрель куни "Ал Садд" билан ўйнашади

"Пахтакор" жамоаси Чемпионлар Лигаси 4-турида Қатарда "Ал Садд" меҳмони бўлади.

Учрашув "Жассим Бин Ҳамад" стадионида Тошкент вақти билан соат 21:00да старт олади. Мазкур ўйиннинг аҳамияти жуда юқори. "Шерлар" ғалаба қозонишса, нимчорак финалга чиқиш учун жуда катта қадамни ташлаган бўлишади. Дуранг натижа ҳам имкониятларини анча яхши ҳолатда сақлаб қолади. Шу сабабли "Пахтакор" мазкур баҳсда ижобий натижага эришиш мақсадида бор кучини ишга солади. Бу ҳақда клуб матбуот хизмати хабар берди.

Тошкентда кечган ўйин жуда қизиқарли ва голларга бой тарзда ўтди. Дохада ҳам яна бир бор шиддатли, кескин, ҳужумкор ва чиройли футболдан баҳраманд бўлишимиз эҳтимоли юқори.

Беллашувни мезбонлардан Педро Корреа ва Акрам Афиф сариқ карточкалар билан боғлиқ дисквалификация туфайли ўтказиб юборади. "Пахтакор"да эса бундай йўқотиш мавжуд эмас.

"Шерлар" бугун 15:30да Тошкентдан Дохага жўнаб кетишди. Эртага ўйин олди тадбирлари ташкил этилади ва жамоа расмий машғулот ўтказади.