"Paxtakor" "Humo"ning VXLda ishtirok etmasligiga o‘z munosabatini bildirdi

Kecha “Humo” xokkey klubi kelasi mavsum Oliy xokkey ligasida (VXL) ishtirok etmasligini ma’lum qildi. Bu esa ko‘plab xokkey muxlislarini biroz xafa qildi.

“Paxtakor” futbol klubi ham “Humo”ning ushbu bayonotidan so‘ng xokkeychilarni qo‘llab-quvvatlashini va ularning qaytishiga umid qilishini bildirdi.

“Humo” xokkey klubi qisqa vaqt ichida katta hajmda ish bajarib, O‘zbekistonga 30 yildan keyin xokkey nafasini olib kirdi.

Klub dastlab asosiy maqsad va vazifalarni aniqlab oldi, marketing faoliyatini muvaffaqiyatli tashkil qildi, tribunalarga ko‘plab muxlislarni jalb qildi. Klubimiz va "Humo" o‘rtasidagi hamkorlikni yuqori baholaymiz. Vakillarimiz shaybani o‘yinga kiritib berish marosimida qatnashishdi, jamoamiz vakillari o‘yinlarga tashrif buyurishdi, xokkey afsonalari "Paxtakor" stadionida mehmon bo‘lishdi.

Qadrli hamkasblar va do‘stlar! "Paxtakor" futbol klubi uzoq bo‘lmagan tanaffusdan keyin sizning qaytishingizga umid bildiradi va yangi kuch, reja va loyihalar bilan O‘zbekiston aholisi sevishga ulgurgan xokkey olamiga qaytasiz”, - deb yozadi “Paxtakor” matbuot xizmati.