Поль Погба майдонга қайтмайди

“Манчестер Юнайтед” ярим ҳимоячиси Поль Погба бу йил майдонга қайтмайди. Машҳур футболчи Франция терма жамоаси машғулотларида жароҳат олди ва камида бир ярим ой давомида даволаниши керак бўлади.

Маълумотларга қараганда, Погба даволаниш жараёнини Франция ёки Англияда ўтказади. Шундан сўнг шахсий мураббийи билан формасини тиклаш учун Бирлашган Араб Амирликларига боради.

Поль Погба манчестерлик сафида 2016 йилдан буён тўп тепмоқда. Унинг амалдаги шартномаси ёзда ниҳоясига етади. Клуб ярим ҳимоячини янги битимга кўндира олмаяпти.

Бугунги кунда “Реал”, ПСЖ ва “Ювентус” франциялик футболчини ўз сафида кўришни истамоқда.

Жорий мавсумда Погба Англия премьер-лигасида тўққизта учрашувда майдонга тушиб, жамоадошларига еттита голли пас оширди.