Премьер-лига клуби Ўруновни олиш шартини айтди!

Россия премьер-лигаси иштирокчиси “Химки” жамоа таркибини кучайтириш учун “Спартак”да ишлари юришмаётган легионер Остон Ўруновни ўз сафига қўшиб олишга қарор қилди.

Москва вилояти шарафини ҳимоя қилаётган ушбу клуб кузатув кенгаши аъзоси Роман Терюшков оммавий ахборот воситаларига берган маълумотида Остон Ўруновни олиш шартларини билдирди.

- Агар “Спартак” Ўрунов билан амалдаги шартномани бекор қиладиган бўлса, футболчи билан музокара ўтказишга тайёрмиз. Остон илгари биз қизиққан футболчилар рўйхатида бор эди, - деди Роман Терюшков.

Қизиғи шундаки, шу мутахассис яқинда журналистларнинг саволига жавоб берар экан, Остон Ўрунов ортиқ “Химки”ни қизиқтирмаслигини таъкидлаганди. Энди вазият ўзгарган кўринади.

Остон Ўрунов 2020 йилнинг бошида Тошкентнинг “Локомотив” жамоаси сафидан “Уфа” кўчиб ўтганидан кейин Россия премьер-лигасида ўз салоҳиятини намоён эта олди.

Ёзги трансферлар вақтида “Уфа”дан “Спартак”га бош директорликка ўтган Шамиль Газизов ҳамбюртимизни ҳам ўзи билан олиб кетди. Аслида Остонга премьер-лиганинг деярли барча гранд клублари шартнома таклиф қилаётган эди.

Шамиль Газизов ва “Спартак” хўжайини Леонид Федун муносабатлари бузилганини ортидан уфалик мутахассис олиб келган Остон Ўруновни ҳам пойтахт жамоасида ўйнатишмади.

Бир неча маротаба ижара асосида “Уфа”га жўнатилган футболчи ёзда яна “Спартак”га қайтганди. Москваликлар уни сотиб юборишга қарор қилган. Ҳамюртимиз Россия ва Осиёнинг бир неча клубларидан таклиф бўлди. Ҳатто “Навбаҳор” ҳам моҳир ярим ҳимоячини Наманганга қайтармоқчи бўлди. Бироқ, “Спартак” билан шартномада катта маошга эга бўлган футболчи маблағ масаласида бошқа клублар таклифини қабул қилмади.

Энди москваликлар нима қилиб бўлса ҳам, ўзбекистонлик легионер билан 2025 йилнинг ёзигача имзоланган битимни бекор қилишга ҳаракат қилмоқда. Вазиятни кузатиб бораётган хориж оммавий ахборот воситалари Ўрунов келишувни бекор қилиш учун шартномада кўрсатилган маошини тўлиқ тўланишини талаб қилаётган экан.

Ҳозирча, Остон Ўрунов ўйин амалиётисиз қолмоқда. Агарда у “Спартак” билан ҳамкорликни расман тўхтатса, унинг бозори яна қайнаши тайин.

Европа клублари назарига тушган легионеримиз яна гол уриб, жамоасини биринчи ўринга кўтарди!

Шомуродовни олишга сўнгги уриниш!

Бизда ҳам айб бор. Шаҳбоз Умаровни бошқача жазолаш керак эди!

Шомуродов Россияга қайтадими?

“Рома”: Шомуродов супертўпурар йўлини тўсиб турибди!