Prevyu. AGMK birinchi davradagi mag‘lubiyat uchun revansh oladimi?

O‘zbekiston Superligasida ikkinchi davra uchrashuvlari start oldi.

Ertaga AGMK 14-tur doirasida Olmaliqda Toshkent viloyatining boshqa vakili - "Metallurg"ni mehmon qiladi.

Birinchi davradagi Bekobodda o‘tgan bahsda “konchilar” mag‘lubiyatga uchragandi. Mirjalol Qosimov shogirdlari o‘sha mag‘lubiyat uchun revansh olishga harakat qilib ko‘rishadi.

"Metallurg" yozgi transfer oynasida tarkibda qator o‘zgarishlarga qo‘l urdi. Xususan jamoani Musaev, Qutibaev va Isoqjonov kabi futbolchilar tark etgan bo‘lsa, ketganlar o‘rni 5 nafar futbolchi bilan to‘ldirildi - Anvar G‘ofurov, Bektemir Abdumannonov, Behruz Shodmonov, Boburbek Farhodov va legioner futbolchi Kerim Palich.

AGMK asosiy jamoa safini Kasyan, Mishenko va Polvonov tark etgan bo‘lsa, ularning o‘rniga Filiposyan, Hasanov, Mirahmadov, Papava, Suyunov va Spataru taklif etildi.

3 avgust kuni soat 19:00da boshlanajak o‘yinni Ahrol Risqullaev boshchiligidagi hakamlar brigadasi boshqarib boradi. Ushbu referi 6-bor AGMK ishtirokidagi uchrashuvda ishlaydi. Risqullaev boshqargan o‘yinlarda AGMK quyidagi statistikani qayd etgan: 1 g‘alaba, 1 mag‘lubiyat va 3 durang. VAR hakami sifatida esa Aziz Asimov ishlaydi.

Bo‘lajak o‘yin Toshkent viloyati derbisining ichki chempionat doirasidagi 30-uchrashuviga aylanadi. Hozircha jamoalar o‘zaro uchrashuvlarda muvozanatni teng saqlashmoqda: har ikki jamoada 13 g‘alabadan mavjud. Atiga 3 uchrashuvda durang qayd etilgan.

AGMK matbuot xizmati