PSJ o‘yinchilariga Luis Enrikening qarori yoqmadi

Kilian Mbappe “Real”ga o‘tib ketganidan keyin PSJ bosh murabbiyi Luis Enrike jamoadagi ayrim vazifalarni bajarish mas’uliyatini boshqa o‘yinchilarga yuklashiga to‘g‘ri kelmoqda.

Parij klubi murabbiylar shtabi Mbappe o‘rniga asosiy penaltichi qilib, portugaliyalik yarim himoyachi Vitinyani tayinlagan edi. Biroq bosh murabbiyning bu qarori jamoaning ayrim o‘yinchilariga ma’qul kelmadi.

RMC Sport nashrining yozishicha, bir guruh futbolchilar Vitinyaning asosiy penaltichi bo‘lishiga ochiqchasiga qarshi chiqqan.

Endi 11 metrlik nuqtadan turli o‘yinchilar zarba beradigan bo‘lyapti. Ular orasida Vitinya ham bor. Umuman jamoadagilar orasida Usmon Dembele ham nuqtadan deyarli bexato zarba beradi. Bundan tashqari, Randal Kolo-Muani ham dastlabki turda penaltini aniq bajarib, gol urdi.