ПСЖ тез орада АПЛ клуби билан музокара бошлайди

ПСЖ раҳбарияти “Эвертон” ҳужумчиси Мойзе Киннинг трансфер ҳуқуқини сотиб олмоқчи.

Италиялик журналист Жанлука Ди Марционинг хабар беришича, парижликлар тез орада 21 ёшли футболчини сотиб олиш бўйича АПЛ клуби билан музокараларга киришади. Ўз навбатида “Эвертон” ушбу трансфердан 40 миллион евро ишлаб олишни кўзламоқда.

Агар томонлар келиша олмаса, у ҳолда “ирисчилар” Кинни Италия клубларига таклиф қилади. Боиси, Италия терма жамоаси аъзосига А Серия грандларидан жиддий қизиқишлар бор.

Жорий мавсумни ПСЖ сафида ижара асосида ўтказаётган Кин 33 та ўйинда майдонга тушди ва 16 та гол ҳамда 1 та голли узатмага муаллифлик қилди. Унинг айни дамдаги трансфер нархи эса 35 млн еврога баҳоланмоқда.