Қатардаги Осиё кубогида ярим автоматлаштирилган офсайд технологияси (SAOT) дан фойдаланилади. Унинг қулайлиги нимада?

Хабарингиз бор, январь ойида терма жамоалар ўртасидаги Осиё кубоги мусобақаси бўлиб ўтади.

Мазкур турнирда мусобақа расмийлари барча 51 ўйинда ярим автоматлаштирилган офсайд технологияси (SAOT) тизими ёрдамидан фойдаланишга қарор қилди. Бу Осиё Футбол Конфедерацияси (ОФК) мусобақаларида SAOTнинг илк бор қўлланилишидир. 

ОФК президенти Шайх Салмон бин Иброҳим ал-Халифа бу ҳақда шундай деди: "Бизнинг Осиё ўйинлари расмийлари дунёнинг энг яхшилари қаторига киради ва ярим автоматлаштирилган офсайд технологияси бу мусобақада дебют қилади. Бу эса уларга янада юқори аниқликни белгилашга ёрдам беради", - деди президент.

SAOT тизими ФИФА томонидан чиқарилган ва IFAB томонидан тасдиқланган бўлиб, йўриқномаларга мувофиқ кенг қамровли синовдан ўтказилди.

Унда 12 та ихтисослашган камералардан фойдаланилади, улар тўп ва ўйинчиларнинг майдондаги аниқ позициясини кузатиш имкониятига эга. Хусусан, оёқ-қўлларнинг ҳолатини, шунингдек, офсайд қарорлари учун тегишли бўлган бошқа барча тана қисмларини аниқлай олади. Энди ҳужумчи сўнгги рақиб уйинчисидан тўлиқ олдинда қолиб кетмаган бўлса, офсайд ҳисобланмайди.

Ушбу технология сунъий интеллектдан фойдаланган ҳолда аниқ ва тезкор жойлашувни текширишни осонлаштиради. Ўйиндан ташқари ҳолатда деб ҳисобланган ўйинчи тўпни қабул қилганда, ВАР тизимига огоҳлантириш юборилади ва у технология ёрдамида автоматик равишда чизилган офсайд чизиғидан дарҳол позицияни текширади. Бундай ҳолатда якуний қарор майдондаги ҳакамга хабар берилгунга қадар ВАР текширувидан ўтади. Якуний қарор эса бош ҳакам томонидан қабул қилинади.

Қарор қабул қилиш жараёни тугаллангандан сўнг ўйинчининг позициясини аниқлашда фойдаланилган маълумотлар 3D анимацияга айлантирилади, улар стадионлардаги улкан экранларда кўрсатилади ҳамда бу шаффофликни таъминлашга хизмат қилади.