Қизини урган ваҳший футболчи 14 йилга қамалди

Собиқ футболчи Кирнан Хьюз‑Мейсон икки яшар қизини уриб, майиб қилгани учун 14 йилга қамоқ жазосига ҳукм қилинди.

32 ёшли Хьюз‑Мейсон болаларга шавқатсизлик қилиш, қасддан оғир шикаст етказишда айбдор, деб топилди.

2020 йили икки ёшли қизалоқ оғир аҳволда шифохонага ётқизилади. Унинг оёғи, орқаси, юзи ва кўкрак қафасининг 17 жойида жароҳат борлиги аниқланади. Ўта оғир бош ва мия жароҳатини олган қизча икки ҳафта давомида комада ётади. Ана шу жароҳатлар таъсирида қизча энди доимий қаровга муҳтож.

Хьюз‑Мейсон ўз айбини яшириш учун қизини ўйинчоқлар устига йиқилиб тушганлигини айтиб, мутахассисларни чалғитишга уринган.

Қизчага қўл кўтарган собиқ футболчис “Арсенал” ва “Тоттенхэм” академиялари тарбияланувчиси ҳисобланган. Фаолияти давомида “Миллуолл” жамоасида тўп тепган. Унга ҳукм ўқилгунига қадар “Энфилд Боро” жамоасида мураббий бўлиб ишлаб келаётган эди.