Раньери: “Қоидалар ҳар ўйинда ўзгармоқда, ВАРнинг аралашуви адолатсиз бўлди”

"Рома" бош мураббийи Клаудио Раньери "Аталанта"га қарши учрашувда (1:2) ВАР тизимининг аралашуви ва ҳакамлик қароридан қаттиқ норози бўлди.

63-дақиқада ҳисоб 1:1 бўлган пайтда ҳакам Симоне Соцца римликлар фойдасига пенальти белгилади — Куадио Коне Марио Пашалич билан тўқнашувдан сўнг жарима майдонида йиқилди. Бироқ ВАР текширувидан сўнг 11 метрлик жарима бекор қилинди.

— Мен экспертлардан сўрамоқчиман: бу пенальти эди ёки йўқ? Агар бу ҳолат “60/40” бўлса, бизга айтилганди-ку, ВАР фақат аниқ ва равшан хатоларда аралашиши керак, деб.

Кўриниб турибди, Пашалич нотўғри ҳаракат қилди, оёғини тўғри қўймади ва футболчимизга (Коне) тегди. Шу сабаб, ВАР бунга аралашмаслиги керак эди. Ҳакам пенальти берган — демак, қарор ўзгармаслиги керак эди.

Қоидалар ўйиндан ўйинга ўзгаряпти, биз буни қабул қиляпмиз, лекин лигамизда яхлитлик йўқлиги хафалик уйғотади. Аниқ кўриниб турибди-ку: Пашалич Коне билан контактга кирди. Ҳакам пенальти берган экан, ВАР сукут сақлаши керак эди.

Мен “пенальти борми ёки йўқ” деб сўрамаяпман. Мен сўраяпман: ВАР тизими тиззадан ёки оёқ панжасидан бўлган контактларга аралаша оладими?

Биз қабул қиламиз, лекин спортдаги адолат учун қоидалар аниқ бўлиши керак. Улар ҳақиқатдан ҳам ўзгардими? — дея таъриф бериб ўтди италиялик мутахассис.