Рашид Ғофуров: "Асосий таркибимиздан 5 нафар футболчи йўқ эди"

Про-лиганинг 18-туридан ўрин олган “Машъал” – “Навбаҳор-фарм” (2:0) учрашувидан сўнг, фарм жамоамиз мураббийи Рашид Ғофуров матбуот анжуманида иштирок этиб, ОАВ ходимларининг саволларига жавоб берди.

Фарм жамоаси устози одатдагидек, ўз сўзини ўйин ҳақидаги фикрлари билан бошлади.    

- Бугунги баҳсда икки хил бўлимларга гувоҳ бўлдик. Биринчи бўлимда мезбонларга ҳужум учун деярли имконият бермадик. Иккинчи бўлимда эса йигитларнинг ўйинларида пасайиш кузатилди, биринчи бўлимдаги каби ўйнамадик. Балки шамол таъсир қилгандир. Агар биринчи бўлимдаги ўйинимизни давом эттирганимизда, натижа бошқача бўлиши мумкин эди.

- Ҳакамлик ҳақида қандай фикрдасиз?

- Ҳакамлик ҳақида гапирганим билан фойдаси йўқ. Бу фақат ўзимнинг зараримга ишлайди. Уларнинг ишини кўриб чиқувчи қўмита бор. Ҳакамлик устидан шикоят қилсак, ўша ҳакам кейинги турда ишламаса, бизга қизиқ ҳам эмас ёки бирон фойдаси йўқ.

- Футболчилик вақтингизда “Машъал”да ўйнагансиз. Бугун мураббий сифатида собиқ жамоангиз билан баҳс олиб бордингиз. Таассуротлар қандай?

- Ҳа, футболчилик вақтимда “Машъал”да ўйнаганман. Кучли жамоа эди, чемпионатда юқори ўринлар учун курашарди. Бу жамоа сафида Чемпионлар Лигасида ўйнаганман, жуда яхши таассуротлар қолган.

Ҳозирги “Машъал” ҳам ёмон эмас, фақат ўз даражасида ўйнамаяпти. Кучли таркиб бор, шароитлари яхши. Суперлигани мақсад қилган клуб биз каби жамоалар билан ўйинда бир бош устун ўйнамаса, камситмоқчи эмасман, уларни яхши жамоа дейиш қийин. 

- Бугун Асрор Алиқулов ва Рашид Ғофуровлар жамоаси ўзаро ўйнади. Сизнингча, кимнинг жамоаси устунроқдек бўлди?

- Натижага қарасангиз, мезбонлар ютди. Демак, натижа бўйича улар устунроқдек бўлишди.

- Биринчи даврада Наманганда кечган ўйинда 2:2 ҳисоби қайд этилганди. Бугун “Машъал” дарвозасига гол ура олмаганликларингга сабаб нима?

- Намангандаги ўйин жанговар руҳда ўтганди. Биласизми, ўша “Машъал” менинг назаримда, ҳозиргисидан анчайин кучлироқдек эди. Бугун гол ура олмаганимизга сабаб сифатида ҳар икки бўлимда ҳам бир хил ўйин намойиш этмаганимизни кўрсатишим мумкин. Шунингдек, бугун асосий таркибимиздан 5 нафар футболчи йўқ эди. Ўйин давомида захира бўйича бироз муаммоларга учрадик. Бизнинг таркибимиз фақат маҳаллий футболчилардан шакллантирилган.

“Навбаҳор” ПФК матбуот хизмати.