"Real"da Kurtua o‘rnini bosadigan darvozabon nomzodi muhokama qilinmoqda

"Real Madrid" rahbariyati 34 yoshli darvozabon Tibo Kurtuaning kelajakdagi o‘rnini bosishi mumkin bo‘lgan nomzodlar yuzasidan ichki muhokamalarni boshlagan. Bu haqida Mundo Deportivo nashri xabar berdi.

Manba ma'lumotiga ko‘ra, ehtimoliy vorislar ro‘yxatida "Brayton" va Niderlandiya terma jamoasi posboni Bart Verbryuggen nomi tilga olinmoqda. Shu bilan birga, klub o‘z akademiyasiga ham katta umid bog‘lamoqda. Akademiya tarbiyalanuvchilari orasida eng asosiy nomzod sifatida "Real Kastilya" darvozaboni Fran Gonsales ko‘rilayotgan qayd etilgan.

Shu bilan birga, hozircha Kurtua jamoa uchun mutlaqo almashtirib bo‘lmas figura ekani ta'kidlanmoqda. Shu sababdan, yaqin vaqt ichida yangi darvozabonni olish masalasi klub uchun dolzarb vazifa hisoblanmaydi.

Tibo Kurtua 2018 yildan buyon "Real" sharafini himoya qilib kelmoqda. 2022 yil oktyabr oyida u Lev Yashin nomidagi sovrinni qo‘lga kiritib, 2021/2022 mavsumining eng yaxshi darvozaboni sifatida e'tirof etilgan.

Hozirda Kurtua Belgiya terma jamoasi ixtiyorida bo‘lib, 2026 yilda bo‘lib o‘tadigan jahon chempionatiga tayyorgarlik ko‘rmoqda.