“Реал” Ҳусанов трансфери бўйича қандай қарорга келди?
“Ланс” марказий ҳимоячиси Абдуқодир Ҳусанов қишки трансферлар даврининг энг муҳим фигураси бўлиб турибди.
Европанинг айрим нашрлари ўзбек футболчиси ва унинг манфаатларини ҳимоя қилаётган мутахассислар “Манчестер Сити”ни танлагани ҳақида маълумот тарқатган бўлса-да, бу трансфер ҳали ўзининг расмий тасдиғини топгани йўқ.
Қоларверса, ўша манбалар ҳам “шаҳарликлар” ва ўзбек футболчиси ўртасидаги шартнома ой охирида имзоланиши мумкинлигини билдирган.
Демак, Ҳусановнинг хизматларига кўз тикаётган ўндан зиёд клублар ҳали унинг трансферидан умидини узмаса ҳам бўлади. Вазият исталган вақтда ўзгариб кетиши мумкин.
- Foot Mercato нашрининг маълум қилишича, Абдуқодир Ҳусановга яқин манбалар қайси клубга ўтиш ҳақидаги якуний қарорни футболчининг ўзи қабул қилишини таъкидлади. Шу боис, ҳозирча ўзбек легионерининг келажаги мавҳум бўлиб турибди. Кўп нарса унга таклиф қилинадиган спорт лойиҳаси ва ўзининг шахсий мақсадларига боғлиқ бўлади. Абдуқодир ва унинг яқинлари ҳар бир таклифни пухта ўрганиб чиқишини маълум қилган, - деб ёзмоқда foot-sur7.fr нашри.
Ўзбекистонлик футбол ишқибозларини Ҳусановга “Реал” ҳам қизиқаётгани ҳақидаги ахборот анча тўлқинлантириб юборган эди.
Испания футболининг энг нуфузли манбаларидан бири – fichajes.net портали “Реал”нинг бу трансфер бўйича позиция ҳақида маълумот берди.
- “Реал” раҳбарияти “Ланс”да ўз салоҳиятини намойиш қилиб келаётган Абдуқодир Ҳусанов ёрдамида ўз ҳимоя чизиғини ҳозир ва келажак учун мустаҳкамлашга уринади.
Ёш марказий ҳимоячи Франция чемпионатидаги ажойиб ўйинлари билан “Қироллик клуби” директорлар кенгаши вакилларининг эътиборини қозонди ва улар бу легионернинг хизматларидан фойдаланиш вариатини жиддий тарзда кўриб чиқмоқда.
Ўзбек футболчиси ҳимояда ишончли ўйнай олиши, тактик интеллекти ва ҳимояни бошқариш қобилияти билан Европа футболида ном қозонди. Унинг бу сифатлари Мадрид клуби мутасаддилари назаридан четда қолгани йўқ. Раҳбарият бу ҳимоячининг трансферини стратегик аҳамиятга эга эканини таъкидлаган ҳолда, мудофаанинг рақобатбардошлигини таъминлаб, имкониятларини мустаҳкамлашини эътироф этмоқда.
“Ланс” ўз кашфиёти бўлаётган қизиқиш ортидан унинг трансфер баҳосини кўтаришга ҳаракат қиляпти. “Реал” ўзининг ёш истеъдодларга сармоя тикиш сиёсатидан келиб чиқиб, бу трансферни амалга ошириш масъулиятини ўз зиммасига олиши кутилмоқда.
Агар бу трансфер амалга ошса, ўзбек футболчиси учун катта сакраш бўлади. “Реал” эса, ўз ҳимоя чизиғи тизимини янада мустаҳкамлаб олади. “Ланс” вакиллари Ҳусанов трансферидан ғазнага тушган пулн янги режаларига йўналтириши мумкин, - деб ёзмоқда fichajes.net портали эксперти Начо Эстрелья Домингес-Момпель.
Эслатиб ўтамиз, Абдуқодир Ҳусанов 2023 йилнинг ёзида “Ланс”га кўчиб ўтганидан бери бу жамоа сафида барча турнирларда жами 31 та учрашувда иштирок этиб, ҳимоядаги вазифаларини бажаришдан ташқари, битта голли пас ҳам узатди.
Легионеримизнинг “Ланс” билан амалдаги шартномаси 2027 йилнинг 30 июнигача тузилган.
Фикрлар