“Реал” кутаётган Клопп келажаги бўйича баёнот берди

“Реал” клуби президенти Флорентино Перес бош мураббийликка Юрген Клоппни олиб келиш мақсади борлигини маълум қилганидан кейин германиялик мутахассис атрофидаги гап-сўзлар авжига чиқди.

2024 йилнинг ёзида “Ливерпуль”ни тарк этганидан бери Клопп мураббийлик фаолиятидан таътилга чиққан эди.

Энди тажрибали мутахассис “Реал”нинг унга қизиқиши ортидан келиб чиқаётган хабарларга муносабат билдирди.

Клопп яқин вақт ичида мураббийлик фаолиятига қайтишни режалаштирмаётганини маълум қилди.

- Мен футбол жамоасини бошқара олишимни тушунаман, лекин бу бутун умрим давомида мураббий бўлиб қолишим шарт, дегани эмас. Мен ўзимни янги соҳаларда синаб кўришни истадим.

Red Bull компанияси менга босқичма-босқич шакллантирилаётган янги роль таклиф қилди. Ҳозир ўзимни жуда қулай ҳис қилаяпман — қаерда бўлсам, ўша жой менга маъқул. Бошқа жойга бориш истагим йўқ.

Мен аввал танимаган кўплаб инсонлар билан учрашдим, турли бизнес учрашувларда қатнашдим ва ҳатто аввал эшитмаган атамаларни ўргандим. Бу ҳақиқатан ҳам жуда фойдали давр бўлди. Бир йил ичида беш йиллик тажриба олдим, - деди Клопп The Athletic нашрига.

Айни пайтда Юрген Клопп Red Bull корпорацияси тузилмасида футбол йўналиши бўйича глобал раҳбар лавозимида ишламоқда.