“Реал” ноёб истеъдодга эга футболчи топди

“Реал” мутасаддилари Нидерландия чемпионатидан янги истеъдод эгасини топди. Marca нашрнинг ёзишича, мадридликлар “АЗ Алкмар” жамоасининг 19 ёшли ярим ҳимоячиси Кес Смитга жиддий қизиқяпти.

Сўнгги маълумотларга қарганда, “Қироллик клуби” бу футболчи узоқ йиллар давомида жамоани кучайтириб боришига қатъий ишонч билдирмоқда.

Шу билан бирга Мадрид клуби мутасаддилари агар клуб Смитни ҳозир трансфер қиладиган бўлса, ёш ўйинчи ички рақобатга дош беролмаслигини ҳам инобатга оляпти. “Реал” ўйинчи билан ҳозирдан алоқага киришиб, уни кейинчалик трансфер қилиш вариантини ўрганиб чиқишга киришди.

 “АЗ Алкмар” тизимида тарбияланган Кес Смит биринчи жамоага қўшилганига бир йил бўлди. Шунга қарамай, марказий ярим ҳимоячи асосий таркиб ўйинчисига айланди.

Смитнинг клуб билан шартномаси 2028 йилнинг ёзигача давом этади. Transfermarkt портали экспертлари профессионал футболдаги дебют мавсумини муваффақиятли ўтказган футболчининг нархини беш баравардан кўпроққа кўтарди. Айни пайтда Смит 5 миллион еврога баҳоланяпти.