“Реал” қаршисида ожиз қолган ўйиндан кейин “Барса” раҳбарлари Хавига қандай муносабат билдирди?

Испания Суперкубоги финалида “Барселона” ашаддий рақиб саналган “Реал”дан 1:4 ҳисобида қақшатқич мағлубиятга учради.

Бу мағлубиятдан кейин кўпчиликни “Барселона” бош мураббийи Хави Эрнандесга нисбатан клуб хўжайинларининг муносабати қандай экани қизиқтиряпти. Вазиятга спорт директори Деку ойдинлик киритди.

- Хави борасида берилаётган саволлар мантиққа асосланмаган. Хавига клуб раҳбарияти тўлиқ ишонади. Бу мағлубият режаларимизни ўзгартирмайди, - деди Деку.

Хави Эрнандес “Барселона”ни 2021 йилдан бери бошқариб келмоқда. Испаниялик мутахассис ўтган мавсумда чемпионликни қўлга киритди. Унинг амалдаги шартномаси 2025 йилнинг ярмигача тузилган.

Бироқ, кейинги пайтда Каталония суперклуби раҳбарлари Хави ўрнига бошқа мутахассисни олиб келиш учун ҳаракат бошлагани ҳақида маълумотлар тарқатилган эди.