“Реал” тўхтамайди! Мадридликлар “Арсенал” кўзлаган юлдузни олиб қўймоқчи

“Реал” ёзги трансферлар даврида жамоанинг бир неча позициясини кучайтириш бўйича иш олиб бормоқда. Мадридликлар майдон марказини кучайтириш учун “Реал Сосьедад” етакчисини нишонга олган.

Аслида Мартин Субименди анчадан бери Европанинг қатор грандлари нишонида турибди. Бироқ шу пайтгача ўз жамоасига содиқлигини кўрсатиб келмоқда.

Аммо сан-себастьянликлар юлдузини ортиқ ушлаб қола олмайди. Бу ўйинчини “Арсенал” ўз сафига таклиф қилган эди. “Канонирлар” испан клубига Субимендининг шартномасида кўрсатилган 60 миллион евро миқдоридаги бадал пулини тўлашини билдирди.

“Реал”ни Лука Модрич тарк этиши аниқ бўлганидан кейин энди “Қироллик клуби” хорватиялик ўрнини испан футболчиси билан тўлдиришга қарор қилди. COPE  нашрининг ёзишича, мадридликларнинг янги бош мураббий Хаби Алонсо клуб раҳбариятидан Мартин Субимендини нима қилиб бўлса ҳам, олиб беришни сўраяпти.

Субимендининг амалдаги шартномаси 2027 йилнинг ярмигача давом этади. Жорий мавсум ярим ҳимоячи барча турнирларда 48 та учрашув ўтказиб, иккитадан гол ва ассист муаллифи бўлди.