"Реал"га қишда янги дарвозабон келади

Бильбаонинг “Атлетик” клуби дарвозабони Кепа Аррисабалага қишки трансферлар даврида Мадриднинг “Реал”ига кўчиб ўтади. Бу ҳақда Marca нашри хабар тарқатмоқда.

Юқоридаги манбаанинг ёзишича “қироллик клуби” мураббийлар штаби қишки трансферлар даврида айнан мана шу позицияни кучайтиришни режалаштиришмоқда. Бунинг учун улар “Атлетик”ка 25 млн евро таклиф қилишмоқда.

Айтиш лозимки, Кепанинг товон пули аслида 20 млн еврони ташкил этади. Бироқ, “Реал” уни қишда сотиб олиши учун баскларга янада кўпроқ маблағ тўлашга тайёр. Берилган маълумотларга кўра мадридликлар БААда бўлиб ўтаётган клублар ўртасидаги жаҳон чемпионатида иштирок этиб қайтишгач, ушбу трансферни амалга оширишлари кутилмоқда.

Эслатиб ўтамиз, Кепанинг “Атлетик” билан амалдаги шартномаси 2018 йилнинг ёзига қадар имзоланган. “Реал” эса унга 6 йиллик шартнома таклиф қилмоқда.