“Рома” ҳужумчиси Роналду билан жамоадош бўлиши мумкин

"Манчестер Юнайтед" "Бенфика" футболчиси Дарвин Нуньесни сотиб олишга ҳаракат қилиб кўрди. Аммо уругвайлик форвард Англиянинг бошқа бир жамоаси, "Ливерпуль" сафига кўчиб ўтишни маъқул кўрди. Энди “қизил иблислар” ҳужум чизиғини кучайтириш учун бошқа номзод қидиришга мажбур бўлмоқда.

“Daily Star” нашри хабарига кўра, инглиз клуби "Рома" ҳужумчиси Тэмми Абрахамни ўз сафига қўшиб олишни истамоқда.

Англия терма жамоаси ҳужумчиси "Рома"да 2021 йилдан бери ўйнаб келмоқда. 24 ёшли футболчи Премьер лигада ўйнаш тажрибасига эга. Сабаби, у аввалроқ "Челси" ва "Астон Вилла" шарафини ҳимоя қилган.

Абрахам ўтган мавсумда римликлар сафида барча мусобақалар доирасидаги 53 та ўйинда майдонга тушиб, 27 та гол ва 5 та ассист муаллифига айланган.