Роналду "ЖЧ-2026" 1/8 финалида Испанияга қарши бўладиган ўйин ҳақида фикр билдирди

Португалия терма жамоасининг етакчи ҳужумчиси Криштиану Роналду журналистлар билан суҳбатда 2026 йилги жаҳон чемпионати 1/8 финалида Испанияга қарши бўладиган учрашув олдидан ўз фикрлари билан ўртоқлашди.

У ФИФА матбуот хизматига берган изоҳида Испания терма жамоасини мусобақадаги асосий фаворитлардан бири деб атади. Роналдунинг таъкидлашича, бу ўйин Португалия учун осон кечмайди.

"Биз бу баҳсга жиддий тайёргарлик кўрамиз, чунки бу жамоани жуда яхши биламиз. Ўйлайманки, жуда тенг курашли ва томошабоп ўйин бўлади", — деди Роналду.

Эслатиб ўтамиз, Португалия 1/16 финалда Хорватияни 2:1 ҳисобида мағлуб этган эди. Роберто Мартинес шогирдлари кескин курашда ғалаба қозонди. Испания терма жамоаси эса Австрияга қарши учрашувда қийинчиликка дуч келмади ва 3:0 ҳисобида ишончли ғалабага эришди.