Роналду ва Месси мундиалда қачон тўқнаш келиши аниқланди

Португалия терма жамоаси жаҳон чемпионатида ўз гуруҳида биринчи ўринни қўлга кирита олмади. Биринчи поғона Колумбияга насиб этди. Гуруҳ босқичининг сўнгги турида ўзаро тўқнаш келган жамоалар ҳисобни оча олишмади. Натижада португалияликлар беш очко билан чекланди, Колумбия эса етти очко тўплаб, гуруҳ ғолиблигини қўлга киритди.

Шу тариқа кўпчилик кутган Криштиану Роналду ва Лионель Месси ўртасидаги тўқнашув энди фақат жаҳон чемпионати финалидагина амалга ошиши мумкин. Плей-оффнинг илгарироқ босқичларида уларнинг йўллари кесишмайди.

3 июл куни Португалия 1/16 финал босқичида Хорватияга қарши майдонга тушади. Орадан бир кун ўтиб, Аргентина плей-оффнинг илк босқичида Кабо-Верде терма жамоасига қарши баҳс олиб боради.

Мутахассислар фикрича, 2026 йилги жаҳон чемпионати ҳам Роналду, ҳам Месси учун охирги мундиал бўлиши эҳтимоли жуда юқори. Криштиану Роналду жорий йил феврал ойида 41 ёшни қарши олди, Лионель Месси эса турнир давомида 39 ёшга тўлди.