Роналду АҚШ ва Мексикага қарши учрашувларни ўтказиб юбориши мумкин

"Ан-Наср" клуби ва Португалия терма жамоаси ҳужумчиси Криштиану Роналду мушакларидан жароҳат олди ва икки ҳафтадан тўрт ҳафтагача сафдан чиқиши мумкин, дея хабар бермоқда инсайдер Фабрицио Романо.

Жароҳат туфайли Роналду Португалия терма жамоасининг яқинлашиб келаётган йиғинида иштирок этмаслиги истисно этилмаяпти. Бўлажак йиғин доирасида Португалия терма жамоаси Мексика (29 март) ва АҚШ (1 апрель) терма жамоаларига қарши ўртоқлик ўйинлари ўтказишни режалаштирган.

Яқин вақт ичида 41 ёшли португалиялик футболчи қўшимча тиббий кўрикдан ўтади ва тикланишнинг аниқ муддатлари белгиланади.

Аввалроқ, клуб Роналдунинг Саудия Арабистони чемпионати доирасида "Ал-Фейҳа" клуби билан ўтказган сўнгги учрашувидан кейин тизза ости пайидан жароҳат олгани ҳақида хабар берган эди.