Роналду “Барса”га ўтадими? Лапорта жавоб берди

"Барселона" президенти Жоан Лапорта "Манчестер Юнайтед" ҳужумчиси Криштиану Роналдуга қизиқиш билдирилаётгани ҳақидаги хабарларга изоҳ берди.

У аввалроқ 37 ёшли португалияликнинг агенти Жорже Мендеш билан кечки овқатни бирга қилганини тасдиқлаганди.

“Кўпчилик ўйинчилар "Барселона"га ўтишни хоҳлаётгани бизни бахтиёр қилади. Тарихи туфайли "Барселона" топ футболчилар учун жуда жозибали клуб бўлиб қолмоқда. Ҳа, мен Мендеш билан бир неча футболчилар борасида музокара ўтказдим, лекин айнан кимлар эканлигини ҳозирча айта олмайман” , - дея Лапорта сўзларини келтиради “Marca”.

Ўтган мавсум Роналду “Манчестер Юнайтед”нинг барча мусобақалар доирасидаги 39 та ўйинда майдонга тушиб, ўз ҳисобига 24 та голва 3 та голли узатмани ёздириб қўйган. Унинг “қизил иблислар” билан шартномаси 2023 йилнинг 30 июнига қадар амал қилади.